Олтин нархи рекорд даражада кўтарилиб, 46 йиллик рекорд янгиланди

Нью-Йоркда олтин фьючерслари жорий йилда қарийб 71 фоизга ошди ва сўнгги 46 йил ичидаги энг яхши натижа бўлди. Бу ҳақда “Investing” хабар берди.

Сўнгги бор сариқ металл бундай кескин ўсишни АҚШда Жимми Картер президентлиги даврида намойиш этган. Ўша пайтда Яқин Шарқда инқироз авж олган, инфляция тез суръатларда ошган, АҚШ эса энергетика инқирози марказида бўлган.

Бугунги кунда бож тарифлари халқаро савдони қайта шакллантирмоқда, Россия ва Украина ўртасидаги можаро давом этмоқда, Исроил ва Эрон ўртасида таранглик авж олмоқда, АҚШ эса Венесуэла қирғоқлари яқинида нефть танкерларини қўлга олмоқда. Ноаниқлик даврида инвесторлар олтин каби ҳимоя активларига мурожаат қилади.

Олтин барқарор инвестиция сифатида қаралади: инвесторлар инқироз пайтида, инфляция кескин ошганда ёки валюта курслари пасайганда сариқ металл ўз қийматини сақлаб қолишига умид қилади.

“Глобал иқтисодиётнинг асосий белгиси ҳануз ноаниқ бўлиб қолмоқда. Бундай шароитда олтин диверсификация учун стратегик восита ва барқарорлик манбаи сифатида тобора жозибалироқ бўлиб бормоқда”, дейди Жаҳон олтин кенгашининг катта бозор стратегисти Жо Каватони.

Айрим инвесторлар учун олтиннинг камчилиги шундаки, у облигациялар каби қатъий даромад келтирмайди. Бироқ Федерал резерв тизими фоиз ставкаларини пасайтирганда, сўнгги ойларда кузатилганидек, облигациялар даромадлилиги одатда тушади ва бу олтинни янада жозибадор қилади.

Жорий ҳафтада металл навбатдаги рекордини янгилади – йил бошидан бери 50-марта. Котировкалар тарихда илк бор бир унция учун 4 500 доллардан ошди. JPMorgan таҳлилчилари 2026 йилда нархлар 5 000 доллардан юқорига кўтарилишини кутмоқда.

Жорий йилда олтиннинг 71 фоизлик ўсиши S&P 500 индексидан анча илгарилаб кетди: индекс атиги 18 фоизга ошди. 2024 йилда эса олтин фьючерслари 27 фоизга кўтарилган, S&P 500 эса 24 фоизга ўсган эди.

2026 йилда Федерал резерв тизими ставкаларни яна пасайтириши мумкинлиги ҳақидаги кутишлар ҳам котировкалар ўсишини қўллаб-қувватламоқда. АҚШ долларининг заифлашуви ҳам олтин нархининг кўтарилишига ҳисса қўшмоқда, чунки бу уни халқаро инвесторлар учун нисбатан арзонроқ қилади.