Эпштейннинг қамоқда ёзган хати эълон қилинди. Унда Трамп ҳақида ҳам сўз боради

АҚШ Адлия вазирлиги кеча, 23 декабрь куни америкалик молиячи, одам савдоси ва уларни жинсий эксплуатация қилишда айбланган Жеффри Эпштейн иши билан боғлиқ янги ҳужжатлар тўпламини эълон қилди.

Жами тахминан 30 мингта ҳужжат эълон қилинди. Улар орасида Эпштейнга қарши ишларга доир суд баённомалари ва электрон хатлар (кўпчилиги таҳрирланган), шунингдек АҚШ Президенти Дональд Трамп тилга олинган материаллар ҳам бор.

Вазирликнинг билдиришича, ҳужжатларнинг айримларида “Президент Трампга нисбатан ёлғон ва сенсацион айбловлар” мавжуд бўлиб, улар 2020 йилги сайловлар арафасида бевосита ФҚБга юборилган.

“Аниқ қилиб айтамиз: бу асоссиз ва ёлғон даъволардир. Агар уларда ҳеч бўлмаганда озгина ишончли жиҳат бўлганида, албатта, улар аллақачон Президент Трампга қарши қўлланилган бўлар эди”, дея баёнот берди Адлия вазирлиги.

“The Wall Street Journal” ёзишича, эълон қилинган ҳужжатлар орасида Эпштейнга тегишли, деб ҳисобланаётган хат ҳам бор. У узоқ муддатга қамоқ жазосини ўтаётган, вояга етмаганларга нисбатан жинсий зўравонликда айбланган шифокор Ларри Нассарга юборилган. Қамоқхона ходимлари хатни 2019 йил сентябрь ойида, Эпштейн вафот этганидан кейин олишган.

“L.N.” деб белгиланган шахсга йўлланган мактубда муаллиф ўз ўлими ҳақида киноя билан гапиради ва тақдир адолатсиз эканини таъкидлайди. У ўзи билан хат йўлланган одам ўртасида умумий қарашлар бўлганини иддао қилади ҳамда жамиятда таъсирга эга шахслар ҳам шундай қарашларни бўлишишини даъво қилади. Мактубда, шунингдек, юқори лавозимдаги шахсларга нисбатан ўта ҳақоратли ва ахлоққа зид айбловлар илгари сурилади. Муаллифнинг сўзларига кўра, айрим одамлар жазосиз қолмоқда, бошқалар эса қамоқда азоб чекмоқда – бу эса ҳаёт адолатсизлигининг намунаси сифатида келтирилади.

Адлия вазирлиги Жеффри Эпштейн томонидан Ларри Нассарга юборилган, деб тахмин қилинаётган хатнинг ҳақиқийлигини текшираётганини маълум қилди. Вазирликка кўра, конвертдаги почта муҳри Виржиния штатига тегишли бўлиб, ўша пайтда Эпштейн бўлган Нью-Йоркка тўғри келмайди.

“Чиқиш манзилида Эпштейн сақланган қамоқхона кўрсатилмаган ва чиқиш хатлари учун мажбурий бўлган маҳбус рақами ҳам йўқ. Конверт Эпштейн ўлимидан уч кун ўтиб қайта ишланган”, дейилади баёнотда.

Адлия вазирлиги эълон қилган бошқа ҳужжатларга кўра, Дональд Трамп 1990 йилларда Эпштейннинг хусусий самолётида саккиз марта учган, жумладан, рафиқаси ва қизи билан бирга. Трампнинг айтишича, у Эпштейн билан 2006 йилда ҳибсга олинишидан олдиноқ алоқаларни узган.

Дональд Трамп жорий йил ноябрь охирида Адлия вазирлигини Жеффри Эпштейн ишига оид барча материалларни эълон қилишга мажбурловчи қонунни имзолаган. Материалларнинг илк қисми 19 ноябрь куни эълон қилинган бўлиб, у 13 мингта таҳрирланган файлдан иборат эди.

Материалларнинг иккинчи қисми 22 декабрь куни Адлия вазирлиги сайтида пайдо бўлди, аммо бир неча соатдан сўнг файллар ўчириб ташланди. Вазирликнинг билдиришича, “хакерлар вазирликнинг ёпиқ веб-сайтига ноқонуний кирган, у ерда юристлар Эпштейн ишига оид ҳужжатларни расмий эълондан олдин жабрланувчиларни ҳимоя қилиш мақсадида таҳрирлаётган бўлган”. Таҳрирланган материаллар 23 декабрь куни қайта эълон қилинди.