Тошкент метросида йўловчи вагон эшикларини ишдан чиқарди 

Тошкент метрополитени йўловчиси поезд вагони эшикларини ишдан чиқарди. Бу ҳақда Метрополитен матбуот хизмати хабар берди.

Маълум қилинишича, кеча, 16 декабрь куни соат 16:23 да “Мустақиллик майдони” бекатидан “Пахтакор” бекати томон ҳаракатланиши белгиланган 16-сонли ҳаракат таркиби йўловчиларни қабул қилиб, эшикларини ёпаётган вақтда йўловчилардан бири вагонга кириш мақсадида уни очишга уринган.

Оқибатда эшикни ҳимоя қилувчи қурилма механизми ишдан чиққан. Машинист вазиятни зудлик билан бартараф этганига қарамасдан, юзага келган носозлик кейинги бекатга етмасдан қайта такрорланган. Шундан сўнг машинист йўриқномага асосан йўловчиларни бекатга тушириб, ҳаракат таркибини электродепога олиб кетган.

“Ҳурматли метрополитен йўловчилари! Метрополитен объектларида хавфсизлик талабларига риоя этишингизни ва метро мулкига зиён етказмаслигингизни сўраймиз. Зеро биргина эътиборсизлигингиз сиз ва бошқа йўловчиларнинг ҳаёти учун хавф туғдириши мумкин”, дейди “Тошкент метрополитени” ДУК.

Эслатиб ўтамиз, аввалроқ Тошкент метрополитенида касса оператори лавозими бутунлай тугатилиши маълум қилинганди.