Россияда мигрантлар вирусли гепатитга қарши текширувдан ўтказилади

2026 йил 1 мартдан бошлаб Россияга борган мигрантлар ўткир гепатит ва вирусли гепатит B, C  ва D учун текширувдан ўтказилади. Бу ҳақда “Ведомости” хабар берди.

Ушбу ўзгартиришлар Соғлиқни сақлаш вазирлиги томонидан тасдиқланган хорижликлар, фуқаролиги бўлмаган шахслар ва қочқин мақоми ёки вақтинчалик бошпана сўраган шахсларни тиббий кўрикдан ўтказишни назарда тутади. Кейинчалик, текшириладиган хавфли инфекциялар рўйхати кенгайтирилади.

Норматив-ҳуқуқий ҳужжатлар лойиҳалари федерал порталига жойлаштирилган ўзгартиришлар лойиҳасига кўра, бу тартиб “тиббий кўрикдан ўтказишнинг ташкилий асослари ва тартибларини такомиллаштириш” мақсадида киритилмоқда.

Мигрантлар учун тиббий кўрикдан ўтиш, бошқа нарсалар қаторида, Россияда ишлаш, вақтинчалик ва доимий яшаш учун рухсатнома олишда талаб қилинади. Мамлакатга ишлаш учун борган чет элликлар киришдан кейин 30 календарь кун ичида ундан ўтиши керак. Россияга ишлаш билан боғлиқ бўлмаган мақсадларда борганлар киришдан кейин 90 кун ичида буни қилиши керак. Бу “Россияда чет элликларнинг ҳуқуқий мақоми тўғрисида”ги қонунда назарда тутилган.

Айни пайтда хорижликлар ва фуқаролиги бўлмаган шахслар дори воситалари ва атрофдагилар учун хавфли бўлган касалликларга текширилмоқда. Соғлиқни сақлаш вазирлигининг “Хорижий фуқароларни тиббий кўрикдан ўтказиш тартиби тўғрисида”ги буйруғига асосан, ОИВ (шу жумладан, асемптоматик инфекция), сил, сифилис, мохов кабилар шулар жумласидандир.

Февраль ойида миграция сиёсати бўйича фракциялараро ишчи гуруҳи хорижликларни гепатит C’га тестдан ўтказишни таклиф қилди. Давлат думаси спикери ўринбосари Ирина Яровая ушбу касаллик ҳозирда кенг тарқалгани ва Россияга кириб келиш эҳтимоли жиҳатидан катта хавф туғдиришини айтганди.

Миллий тадқиқот университети Иқтисодиёт олий мактаби соғлиқни сақлаш иқтисодиёти институти директори Лариса Поповичнинг айтишича, Россияда ижтимоий аҳамиятга эга касалликларнинг кескин ўсиши кўпинча четдан келаётган мигрантлар билан боғлиқ. Жинсий йўл билан юқадиган инфекциялар бўйича мутахассислар гилдияси президенти, дерматовенеролог Михаил Гомберг меҳнат миграцияси бўйича кўп функцияли тиббиёт маркази филиалида марказлаштирилган ҳолда ишга жойлашиш скрининги ўтказила бошланганидан кейин меҳнат мигрантларининг касалликлари мониторинги яхшиланган.

Бундан ташқари, жорий йилнинг январь ойида Соғлиқни сақлаш вазирлиги чет элликлар ва фуқаролиги бўлмаган шахсларни тиббий кўрикдан ўтказиш тартибини бузган шифокорлар ва тиббиёт муассасаларига нисбатан маъмурий жарима солишни таклиф қилган эди. Хусусан, Маъмурий жавобгарлик тўғрисидаги кодексга янги модда қўшилади. Чет эл фуқаросини тиббий кўрикдан ўтказиш тартибини бузганлик учун жисмоний шахс (шифокор) 25 минг рублдан 50 минг рублгача, мансабдор шахс (поликлиника раҳбарияти) 50 минг рублдан 100 минг рублгача ва юридик шахс (поликлиниканинг ўзи) 250 минг рублдан 800 минг рублгача миқдорда жаримага тортилиши мумкин. Шунингдек, унинг фаолияти 14 кундан 90 кунгача тўхтатилади.

Эслатиб ўтамиз, аввалроқ Россия Президенти Владимир Путин меҳнат муҳожирлари учун амал қилаётган патент тизимини бекор қилиш масаласини кўриб чиқишни таклиф қилганди.