Дронлар сабаб 6,5 минг одам аэропортда қолиб кетди. Бунга Россия айбдорми?

Мюнхен аэропорти ҳаво ҳудуди яқинида бир неча дрон кўриниши сабабли бугун, 4 октябрь куни парвозлар бошланиши кечиктирилди. Бу ҳақда аэропорт оператори маълум қилди.

Кеча, 3 октябрь куни кечқурун, 24 соат ичида иккинчи марта, аэропортнинг ҳар икки учиш-қўниш йўлаги ёпилган – дронлар яна кўрилгани сабабли ўнлаб рейслар бошқа аэропортларга йўналтирилган ёки бекор қилинган, оқибатда тахминан 6 500 йўловчи аэропортда қолиб кетган.

Аэропорт бугун, 4 октябрь куни эрталаб соат 05:00 да очилиши керак эди, аммо дронлар сабабли очилиш кечиктирилди ва йўловчиларга ўз авиакомпаниялари билан боғланиш тавсия қилинди.

“Германия ҳаво ҳаракати назорати тасдиқланмаган дронлар кўриниши сабабли эҳтиёт чораси сифатида Мюнхен аэропортида парвозларни чеклади ва кейинги буйруққа қадар тўхтатди”, дейилади аэропорт сайтидаги баёнотда.

Кейинроқ берилган янгиланган маълумотга кўра, 23 та рейс бошқа йўналишга ўзгартирилган, 12 та рейснинг Мюнхенга келиши бекор қилинган, 48 та парвоз эса кечиктирилган ёки тўхтатилган.

“Аввалги тундагидек, аэропорт ва авиакомпаниялар йўловчиларга ғамхўрлик қилди. Кроватлар, ёрғоқлар, ичимликлар ва газаклар тарқатилди”, дейилади баёнотда. 

Ўтган кечаси, Лондонга учиши керак бўлган самолёт капитани рейс бекор қилингани ҳақида хабар бериб, учиш-қўниш йўлаклари “улар яқинида дронлар кўрилгани” сабабли ёпилганини ва полиция вертолётлари ҳавога кўтарилганини айтган.

Аэропорт сайтидаги маълумотларга кўра, 3 октябрь куни соат 20:35 дан бошлаб келиши керак бўлган рейслар бошқа йўналишга ўзгартирилган.

Мюнхен аэропорти 2 октябрь куни кечаси ҳам дронлар кўриниши сабабли бир неча соатга ёпилган ва ўнлаб рейслар издан чиққан эди.

Сўнгги ҳафталарда Европада авиация ҳаракати дронлар кўриниши сабабли бир неча марта издан чиқарилган, баъзи мансабдорлар бунинг учун Россияни айблаган. Кремль эса ҳар қандай алоқани рад этган.

Германия Ички ишлар вазири Александр Добриндт кеча, 3 октябрь куни полицияга дронларни уриб тушириш учун армиядан ёрдам сўрашни осонлаштирадиган қонунчиликни тезроқ қабул қилишни ваъда қилди.

Россия Президенти Владимир Путин 2 октябрь куни “Валдай” халқаро мунозара клуби мажлисида дронлар ҳақидаги айбловларга ҳазил билан жавоб берди:

“Биз Францияга ҳам, Данияга ҳам, Копенгагенга ҳам энди дрон юбормаймиз”, деди у.

Путиннинг сўзларига кўра, Россияда “Лиссабонгача учадиган дронлар” йўқ ва Европа шаҳарларида улар учун нишон ҳам мавжуд эмас. У Ғарбнинг айбловларини “вазиятни кескинлаштириш ва мудофаа харажатларини ошириш усули” деб атади.