Британия Россияга қарши санкцияларни кенгайтирди

Буюк Британия Россия мудофаа секторига оид 27 та компания ва корхонани янги санкциялар рўйхатига киритди. Бу ҳақда Қироллик ҳукумати бугун, 12 сентябрь куни эълон қилган ҳужжатида келтирилган. 

Унга кўра, “қора рўйхат”га “Анозит”, “Протон”, “Синвент”, “Элеcонд”, “Поиск”, “Солитон”, “Технодинамика”, “Русполимет”, “Бин Инь”, “Синь ю”, Россия қудратли радиотехника институти, “СССР 50 йиллиги” номидаги Брянск кимё заводи, “Мезон” ва “Реконд” заводлари, Редкинский тажриба заводи, “Звукотехника” корхонаси, Сарапул заводи, Митиши асбобсозлик заводи, шунингдек, “Икар” конструкторлик бюроси киритилган.

Жисмоний шахслар орасида санкциялар Елена ва Алексей Малицкийларга нисбатан жорий қилинган. Улар Хитойнинг Shenzhen Blue Hat International Trade компаниясининг ҳамкор эгалари сифатида тилга олинмоқда. Чекловлар, шунингдек, Туркиянинг Mastel Makina компанияси билан алоқадорлиги айтилаётган Озарбайжон фуқароси Шанлик Шукуровга ҳам қўлланган. Мазкур компаниялар ҳам санкциялар рўйхатига тушган.

Бундан ташқари, янги санкциялар пакетига Гонконг, Таиланд, Ҳиндистон ва Туркияда жойлашган компаниялар ҳам киритилган.

Эслатиб ўтамиз, аввалроқ Германия ва Франция урушни тугатиш учун Россияга босимни кучайтириш, мамлакатга қарши янги санкциялар қўллашни режалаштираётгани хабар қилинган эди. Икки давлат етакчилари иштирокида қабул қилинган баёнотда Россия агрессив урушни тугатишга тайёрлигини кўрсатмаётгани, янги санкциялар Россия билан бирга урушни қўллаб-қувватлаётган учинчи давлат компанияларига ҳам қаратилиши мумкинлиги ҳамда Германия ва Франция бу ташаббусни G7 ва Европа Иттифоқи йиғилишларида илгари суриши қайд этилган.