Ҳиндистонда бир ойлик чақалоқнинг қорнидан иккита ҳомила топилди

Ҳиндистонда шифокорлар ноёб касалликка чалинган чақалоқда муваффақиятли операция ўтказиб, унинг танасидан иккита ривожланмаган эмбрионни олиб ташлади. Бу ҳақда “The Times of India” хабар берди.

Ушбу мураккаб операция Харьяна штатининг Гургаон шаҳридаги шифохонада ўтказилган. Шифокорларнинг айтишича, “ҳомила ичида ҳомила” деб аталувчи бу касаллик ҳар 500 мингта ҳолатдан бирида учрайди. Бундай аномалия ҳомиладорликнинг илк босқичида юз беради, яъни ҳомилалардан бири тўғри ривожланмай қолади ва уни эгизаги ўз ичига олади.

Нашрга кўра, чақалоқнинг онаси уч эгизакни туғиши кутилган, аммо ҳомиладорлик давомида улардан бири қолган икки ҳомилани ўзига сингдириб юборган. Туғилган қизалоқ 20 кундан кейин қорин шишиши ва овқат емай қўйиши сабаб шифохонага ётқизилган. Текширув давомида шифокорлар қизчанинг ошқозонини сиқиб турган ўсма шаклидаги тузилмаларни топган. Операция чоғида улар аслида нотўғри шаклланган эмбрионлар экани аниқланган.

Жарроҳлик ишида 15 нафар шифокор қатнашиб, икки соат давомида қизчанинг ички органларига зарар етказмаслик учун ўта эҳтиёткорлик билан ўсма тўқималарини олиб ташлаган.

“Бу жуда ноёб ва мураккаб ҳолат бўлди – ҳам ташхис қўйиш, ҳам операцияни бажариш жиҳатидан. Биз битта эмас, балки бирданига иккита эмбрионни бир қоп ичида, атиги бир ойлик чақалоқ ичидан топдик. Энг қийин вазифа эса шундай митти организмда жарроҳликни нозик аниқлик билан ўтказиш эди”, деган шифокорлардан бири. 

Операциядан сўнг қизалоққа жавоб берилган ва шифокорларнинг айтишича, у ҳозир ўзини яхши ҳис қилмоқда.

Эслатиб ўтамиз, аввалроқ Ҳиндистоннинг Харьяна штатида шифокорлар туғуруқ жараёнида чақалоқнинг қўлини узиб юборганди. Янги туғилган чақалоқ тиббиёт ходимларининг бепарво ва раҳмсиз муомаласи оқибатида жароҳат олган. Чақалоқнинг оила аъзолари ҳолат бўйича шифокорлардан изоҳ сўраганда, шифокорлар жабрланган оилани ҳақорат қилиб, шифохонадан чиқариб юборган. Кейинчалик чақалоқ бошқа шифохонага юборилган.