Трамп илк бор шахсан Украинага қурол-яроғ пакетини ажратмоқчи – “Reuters”

АҚШ Президенти Дональд Трамп ўзининг иккинчи президентлик муддати давомида илк бор шахсан Украинага қурол-яроғ етказиб бериш пакетини ажратади. Бу ҳақда “Reuters” хабар берди.

Нашрнинг ёзишича, шу вақтгача унинг маъмурияти фақат аввалги президент Жо Байден даврида маъқулланган жўнатмаларни юбориб келаётган бўлган. Маълум бўлишича, Украина Қуролли кучлари учун қурол-яроғлар Пентагон захираларидан олинади. Трамп ажратаётган пакет қиймати тахминан 300 миллион долларни ташкил қилиши мумкин. Унда Patriot зенит-ракета тизими ракеталари ҳамда ўрта масофали ҳужум ракеталари бўлиши режалаштирилмоқда.

Қайд этилишича, АҚШ ҳукумати Украина учун ажратилган, Конгресс томонидан тасдиқланган 3,86 миллиард долларлик маблағдан ҳали фойдаланмаган. Украина армиясига ёрдам учун маблағлар охирги марта январь бошида Байден томонидан ажратилган.

Эслатиб ўтамиз, ўтган ҳафта АҚШ Украинага айрим турдаги қуролларни етказишни тўхтатгани ҳақида хабар берилганди. Оқ уй бу қарорни АҚШ ҳарбий ёрдами бўйича текширув (ревизия) билан изоҳлади.  

CNN манбаларига кўра, Президент Трамп Мудофаа вазири Пит Ҳегсетга фақат қурол-яроғ захираларини баҳолашни топширган, аммо жўнатмаларни тўхтатиш ҳақида буйруқ бермаган. Телеканалнинг аниқлик киритишича, Ҳегсет Трампни қурол-яроғ етказиб беришнинг тўхтатилгани ҳақида хабардор қилмаган. 

Ҳафта бошида эса АҚШ Президенти мамлакат Украинага янги қурол-яроғ партияларини юборишини маълум қилди. Маълумотларга кўра, Вашингтон аллақачон артиллерия ўқ-дорилари ва GMLRS реактив снарядлари таъминотини тиклаган.