Юн Сок Ёль яна ҳибсга олинди

Сеул суди Жанубий Кореянинг собиқ президенти Юн Сок Ёлга декабрь ойида қисқа муддатли ҳарбий ҳолат жорий этгани билан боғлиқ айбловлар асосида иккинчи бор ҳибсга олиш ордерини чиқарди. Бу ҳақда “Politico” хабар берди.

Собиқ президент биринчи бор январь ойида ҳибсга олинган, бироқ март ойида озод қилинган эди. Юн декабрь ойида мухолифатни бостириш мақсадида бир неча соат давом этган ҳарбий ҳолат эълон қилгани сабабли қўзғолон уюштиришга уринишда айбланмоқда.

Янги суд мажлиси кеча, 9 июль куни бўлиб ўтган ва етти соат давом этган. Унда Юн устидан қўшимча айбловлар илгари сурилган, хусусан, ваколатни суиистеъмол қилиш, мансабдорлар фаолиятига тўсқинлик қилиш ва расмий ҳужжатларни сохталаштириш. Суд махсус прокурорнинг “собиқ президент эркинликда далилларни йўқ қилиши мумкин” деган даъвосини маъқуллаган.

Собиқ давлат раҳбари тергов ҳибсхонасига жойлаштирилган. Унинг адвокатлари ҳибсга олиш ҳақидаги сўровни “ортиқча ва асоссиз” деб баҳолаган. Агар Юнга янги айбловлар қўйилса, дастлабки суд қароригача у олти ой давомида ҳибсда қолиши мумкин.

Эслатиб ўтамиз, ўтган йилнинг декабрь ойида Юн Сок Ёль мамлакатда ҳарбий ҳолат жорий қилишга уринган. Шундан сўнг, парламент уни қўзғолонга уринишда айблаб, импичмент эълон қилди.   

У қўзғолонга уриниш ҳақидаги айбловларни рад этиб, ўзининг қарорини “сиёсий жиҳатдан асосли” деб атаган ва у давлатни мухолифатдан ҳимоя қилиш учун қабул қилинганини таъкидлаган. Юннинг сўзларига кўра, мухолифат ҳукумат ишини фалаж қилган.

Жорий йилнинг июнь ойида мамлакатда муддатидан олдин ўтказилган президентлик сайловида “Тобуро” демократик партиясидан номзод Ли Чже Мён ғалаба қозонди ва бюллетенларнинг 100 фоизи санаб бўлингандан сўнг 49,4 фоиз овоз тўплади.