Қозоғистонда турмуш қуришга мажбурлаш жиноий жавобгарликка сабаб бўлиши мумкин

Қозоғистонда мажбурий никоҳ учун жиноий жавобгарлик жорий этиш режалаштирилмоқда. Бу ҳақда мамлакат парламентининг депутати Мурат Абенов маълум қилди.

Унинг сўзларига кўра, сўнгги уч йил ичида Қозоғистонда турмуш қуришга мажбурланган шахслардан 214 та мурожаат тушган. Улардан фақат 10 нафари судга етиб борган. Юзлаб жиноий ишлар шунчаки ёпилиб кетган.

“Қиз ўғирлаб кетилганини, машинадан сакраб тушганини, унга нисбатан куч қўлланганини исботлаган бўлсада, улар ҳеч нарса қила олмадилар”, деган Абенов.

Парламент аъзолари томонидан яқин вақт ичида Мажлисда кўриб чиқиладиган тузатишлар ишлаб чиқилди. Улар Қозоғистонда “қиз ўғирлаш” учун жазо жорий этилишини таклиф қилмоқда. Расмий равишда у “мажбурий никоҳ” деб номланади.

“Биз ўзгартиришни тўғри номладик ва барча ишларни кўриб чиқяпмиз. Тафсилотлар аниқланяпти, аммо жиддий жарима бўлади. Маъмурий жавобгарлик бор, оғир ҳолларда эса, қиз 18 ёшга тўлмагани ёки куч қўллангани ёки бир гуруҳ шахслар иштирокида бўлса, жиноий жавобгарлик янада оғирроқ бўлади – 5-7 йилгача қамоқ жазоси”, деган депутат.

Унинг сўзларига кўра, норма жорий йилнинг охиригача кучга кириши мумкин.

2025 йилнинг февраль ойида Мурат Абенов келин ўғирлаш учун жиноий жавобгарлик киритиш ташаббуси билан чиққанини айтган эди. Ўшанда у 3-5 йиллик қамоқ ҳақида гапирган эди.

2024 йилнинг февраль ойида Қозоғистоннинг Инсон ҳуқуқлари бўйича вакили Артур Ластаев Чимкентда шов-шувли тарзда келин ўғирлаб кетилгани ҳақида баёнот берганди. Унинг сўзларига кўра, мажбуран турмушга чиққан қизлар кўпинча жинсий, жисмоний ва руҳий зўравонлик қурбони бўлади.