Трампнинг одами Россия-Украина сулҳига ким тўсқинлик қилаётганини айтди

Украинага Россия билан эҳтимолий ўт очишни тўхтатишнинг барча шартлари ёқмаяпти, аммо томонлар келишув тузишга яқин. Бу ҳақда АҚШ Президенти Дональд Трампнинг махсус вакили Кит Келлогг “Fox News” телеканалига берган интервьюсида сўз очди.

Келлоггнинг таъкидлашича, Киев “ерда, сувда ва осмонда” узайтирилиши мумкин бўлган кенг қамровли 30 кунлик сулҳга рози ва бу режимни бугуноқ ўрнатишни истайди.

У, шунингдек, ўт очишни тўхтатиш режаси жорий йилнинг 23 апрель куни Лондонда бўлиб ўтган “кўнгиллилар коалицияси” йиғилишида муҳокама қилинганини эслатган.

“Улар кўплаб шартлар билан кенг қамровли сулҳга тайёр. Ва украиналиклар бунга рози”, деган Келлогг.

Шунингдек, интервью давомида Келлогг аниқ натижага фақат бир киши – АҚШ Президенти Дональд Трамп эриша олади дея таъкидлаган.

“Менимча, биз яқинмиз. Натижага эриша оладиган ягона инсон – Президент Трамп. Эҳтимол, бизнинг тўсиғимиз Россия Президентидир, у рози бўлмаяпти”, деган Келлогг.

Эслатиб ўтамиз, олдинроқ Кит Келлогг АҚШ Украинага можаронинг тугатилиши бўйича 22 та аниқ шартни тақдим этгани ва Киев уларни қабул қилганини, Украина Россия томонидан амалда назорат қилинаётган ҳудудлардан воз кечишга тайёр экани, бироқ бу юридик жиҳатдан тан олинмаслигини айтганди.