Қирғизистонда оммавий тартибсизлик тайёрлашда гумонланган собиқ депутат қўлга олинди

Қирғизистон пойтахти Бишкек ва Чуй вилоятида собиқ депутат ва “Кырк уруу жети дубан ынтымагы” жамоат ҳаракати аъзолари қўлга олинди. Бу ҳақда Қирғизистон Республикаси Ички ишлар вазирлигига таяниб, “24.kg” хабар берди.

Қайд этилишича, 2024 йил 20 декабрь куни ҳуқуқ-тартибот идоралари ходимларига “Кырк уруу жети дубан ынтымагы” жамоат ҳаракати аъзолари мунтазам равишда йиғилишлар ўтказиб, уларда мамлакатдаги вазиятни беқарорлаштиришга қаратилган оммавий тартибсизликлар, норозилик намойишлари ва митинглар уюштиришга тайёргарлик кўраётгани, талончилик ва мулкни вайрон қилиш билан боғлиқ маълумотлар келиб тушган.

Мазкур ҳолат юзасидан Қирғизистон Республикаси Жиноят кодексининг “Зўравонлик билан бирга оммавий тартибсизликлар уюштириш” моддаси бўйича иш қўзғатилган.

Кеча, 24 февраль куни ҳуқуқ-тартибот идоралари ходимлари 11 кишини, жумладан, Жогорку Кенешнинг собиқ депутатини қўлга олди. Кўздан кечириш чоғида улардан граната, арраланган ов милтиғи, тўппонча, ўқ-дорилар, камуфляж кийимлари, гиёҳвандлик воситалари, диний адабиётлар, махсус ниқоблар, оммавий тартибсизликларни ташкил этиш бўйича йўриқномалар, пичоқли қуроллар, давлат рақамлари, мобил телефонлар, флеш-карталар ва бошқалар топилган. Уларнинг барчаси вақтинчалик сақлаш ҳибсхонасига жойлаштирилган.

“24.kg”нинг ҳуқуқ-тартибот идораларидаги манбанинг айтишича, ҳибсга олинган собиқ депутат Бахит Керимбеков.

Эслатиб ўтамиз, ўтган йил охирида Бишкек шаҳрида Қирғизистон Бош прокуратурасининг Ички хавфсизлик ва ички тергов департаментининг собиқ катта прокурори оммавий тартибсизликларга тайёрланиш, ҳокимиятни зўравонлик билан эгаллаб олиш ва уюшган гуруҳ тузишда гумонланиб, қўлга олинганди.

Моҳимбегим Маъруфалиева