2025 йилда туғиладиган болалар Бета авлод деб аталади

2025-2039 йиллар оралиғида туғилган болалар Бета авлод вакиллари сифатида тан олинади. Бу ҳақда кеча, 29 декабрь куни “New York Post” нашри хабар берди.

Нашрнинг ёзишича, Бета авлод 2010-2024 йиллар оралиғида туғилган Альфа авлод ортидан келади. Ундан олдин – 1997-2010 йилларда туғилган Z авлод, 1981-1996 йилларда туғилган Y авлод ёки Миллениаллар мавжуд эди.

Демограф Марк Маккиндлнинг сўзларига кўра, 2035 йилга бориб, Бета авлод дунё аҳолисининг 16 фоизини ташкил қилади ва улар сунъий интеллект бошқарувида шаклланган янги дунёда яшашни бошлайди.

“Бета авлод кундалик ҳаётнинг барча жабҳаларида – таълим ва иш жойларидан тортиб, соғлиқни сақлаш ва кўнгилочар соҳаларгача сунъий интеллект ва автоматлаштириш тўлиқ интеграцияланган даврда яшайди”, деди Маккиндл.

Шунингдек, экспертнинг таъкидлашича, ушбу янги авлод болалари глобал иқлим ўзгариши, жиддий ижтимоий муаммолар, аҳоли миграцияси ва тезкор урбанизация каби масалаларга дуч келадиган дунёни мерос қилиб олади.

Маълумот учун, авлодлар турли ижтимоий, маданий, иқтисодий ва технологик ўзгаришларга асосланиб таснифланади. Ушбу таснифлаш бир нечта соҳаларда фаолият олиб борувчи тадқиқотчилар, демографлар, социологлар ва маданиятшунослар томонидан амалга оширилади. Энг машҳур таснифлар Америка ва Европа ижтимоий тузилмаларига асосланган бўлса-да, глобал миқёсда ҳам қабул қилинган.

Асосий авлод таснифлари ва уларни шакллантирган олимлар:

• Baby Boomers (1946–1964): Бу тасниф Америка тарихидаги урушдан кейинги “туғилиш портлаши”га асосланган бўлиб, демограф олимлар ва социологлар, жумладан, Девид Футюрал томонидан ўрганилган.
• Х авлод (1965–1980): Дуглас Коупленд томонидан биринчи бор номланган. Бу авлод мураккаб иқтисодий шароитда ва технологик ўзгаришлар бошланишида улғайган.
• Y авлод ёки Миллениаллар (1981–1996): Марк Маккиндл каби демографлар ушбу авлодни аниқ белгилаган. Улар интернет ва рақамли инқилоб даврида шаклланган.
• Z авлод (1997–2010): Илмий ишлар кўп ҳолларда социологларнинг таҳлилларига асосланган. Ушбу авлод технология ва рақамли дунёга интеграцияланган ҳолда улғайган.
• Альфа авлод (2010–2024): Австралиялик демограф Марк Маккиндл ушбу атамани биринчи бўлиб киритган. Альфа авлод тўлиқ рақамли даврда туғилган.

Авлодларни таснифлаш субъектив бўлиши мумкин ва кўпинча минтақавий фарқларни ҳисобга олмайди. Шу сабабли ҳар бир авлод учун аниқ бошланиш ва тугаш саналари бўйича ягона қарор йўқ. Авлод таснифлари асосан Ғарб мамлакатлари маълумотлари асосида яратилади ва бошқа минтақаларга мос келмаслиги мумкин.

Олимлар авлодларни таснифлашда социологик маълумотлар, демографик тенденциялар ва маданий ўзгаришларга таянади. Бу жараён келажакдаги ижтимоий режалаштириш ва стратегияларни ишлаб чиқишда ёрдам беради.