Исроил ҲАМАСга ультиматум қўйди – WSJ 

Исроил ҲАМАСга ультиматум қўйиб, бир ҳафта ичида Ғазо секторида ўт очишни тўхтатиш бўйича келишувга эришиш ва гаровга олинганларни озод қилишни талаб қилди. Бу ҳақда ўт очишни тўхтатиш келишуви муҳокамаси билан таниш бўлган исмини ошкор этмаган Миср расмийларига таяниб, кеча, 3 май куни Американинг “The Wall Street Journal” газетаси хабар берди.

“Хабар 2 май куни ҲАМАС вакилларига етказилди”, деб ёзади WSJ.

Нашрнинг ёзишича, агар ҲАМАС келишувдан бош тортса, Исроил Ғазо секторининг жанубий қисмидаги Рафаҳ шаҳрига олдин эълон қилинган ҳужумни бошлаши билан таҳдид қилган. Исроил бу аҳоли пунктини ҲАМАСнинг сектордаги сўнгги таянчларидан бири деб атайди.

Май ойининг биринчи дам олиш кунида Қоҳирада Исроилнинг Ғазо секторида илгари таклиф қилган сулҳ бўйича музокаралар давом этади. Келишувга кўра, ҲАМАС 7 октябрда Исроилга қилинган ҳужумдан кейин гаровда қолган 30-40 нафар исроилликни озод қилиши керак. 2023 йил ноябридаги қисқа муддатли сулҳ сингари, фаластинлик маҳбуслар ҳам Исроил қамоқхоналаридан озод этилиши кутилмоқда.

Қайд этилишича, ҲАМАС доиралари келишувга “ижобий” жавоб беришга умуман тайёр, бироқ улар гуруҳнинг ҳарбий қаноти раҳбари Яҳё Синварнинг якуний қарорини кутмоқда. У Ғазо сектори остидаги ер ости туннелларида яширинган деб ишонилади ва ундан ҳозиргача Исроил таклифларига ҳеч қандай жавоб бўлмаган.

Апрель ойи ўрталарида Американинг CNN телеканали ҲАМАС вакиллари 40 нафар исроиллик гаровга олинганларни озод қилиш ғоясини рад этиб, олти ҳафталик ўт очишни тўхтатиш даврида икки баравар кўп одамни озод қилишни таклиф қилгани ҳақида хабар берди. Вашингтон расмийлари омон қолган гаровга олинганлар сони жамоатчилик тахмин қилганидан анча кам бўлиши мумкинлигини таъкидлади. Айни пайтда, Исроил расмийларига кўра, 130 дан ортиқ одам ҲАМАС қўлида, аммо уларнинг тақдири номаълум.

Шуниси эътиборга лойиқки, бундан бир неча кун олдин Исроил Бош вазири Биньямин Нетаньяху яна бир бор Исроил мудофаа кучларининг Ғазо секторидаги ҳужумини давом эттириш нияти ва келишувга эришилиш-эришилмаслигидан қатъи назар, Рафаҳда қуруқликдаги операцияни бошлашга тайёрлигини эълон қилган эди. 

Рафаҳга ҳужум камида февраль ойидан бери тайёрланмоқда, Исроил бундай режалари учун халқаро ҳамжамият томонидан танқид қилинмоқда. Секторда ҳарбий амалиёт бошланиб, минтақа шимолидан бир ярим миллиондан ортиқ тинч аҳоли эвакуация қилиниши ортидан 1,3 миллионга яқин фаластинлик Рафаҳдан бошпана топди.

Норвегия қочқинлар кенгаши раҳбари Ян Эгеланднинг сўзларига кўра, Рафаҳ аҳолисига озиқ-овқат ва ичимлик суви етишмайди. Мунтазам бомбардимон қилинаётган шаҳар Мисрдан Ғазо секторига кириб келаётган гуманитар ёрдам учун асосий логистика маркази ҳисобланади. Аввалроқ Халқаро суд Исроилга ушбу секторга гуманитар ёрдам етказилишига аралашмасликни буюрган эди.