O‘zbekistonda yangi telekanal ish boshlashi mumkin

“Mening fikrim” jamoaviy murojaatlar portaliga "Parlament TV telekanalini tashkil etish haqida"gi petitsiya e’lon qilindi. 

“Saylov kampaniyasi vaqtida men barcha partiyalarning saylovoldi dasturlarini, fikr va mulohazalarini televideniye, OAV, internet orqali kuzatib bordim. Har bir siyosiy partiyaning jarayonga munosabati turlicha yangradi. Bularni ko‘rib, “yetti o‘lchab, bir kesib” bitta taklif bilan murojaat qilmoqchiman. Ya’ni, partiyalar orasida raqobat maydonini yuzaga keltirish uchun “Parlament TV” telekanalini tashkil etishni taklif qilaman”, deyiladi murojaatda. 

Ma’lumki, hozirda O‘zbekistonda beshta partiya faoliyat olib bormoqda. Shu munosabat bilan, har bir partiya deputatlarining ish jarayonlari haftada bir marta ko‘rsatilishi taklif qilingan. 

Shunda qaysi partiyaning faoliyati to‘g‘risidagi efirlar qachon namoyish etilishini bilib olgan bo‘lardi. Misol uchun, “Adolat” sotsial-demokratik partiyasi dushanba kuni yoki “Milliy tiklanish” demokratik partiyasi seshanba kuni va hokazo. Shanba va yakshanba kunlari eng dolzarb mavzulardagi ko‘rsatuvlar takroran ko‘rsatilsa, dam olish kunlarida mehnat munosabatlarida band bo‘lgan aholining ham mazkur ko‘rsatuvlarni ko‘rishlariga imkon yaratilishi ma’lum qilingan. 

Ta’kidlanishicha, mazkur telekanal orqali mahalliy kengashlar faoliyati ham yoritib borilishi zarur. Shunda ushbu telekanal chinakamiga xalq bilan deputatlar orasidagi asosiy vositachiga aylanadi. Bunda har bir partiya telekanal orqali o‘zining qilgan ishlari bilan xalq orasida hurmat qozonishni boshlaydi. Xalq deputatlarni tanishni boshlaydi, ularga ishonishni boshlaydi. Agar shu jarayonni tashkillashtirsa, nafaqat xalqning ishonchiga, balki partiyalardagi deputatlarning ma’suliyat bilan ishga yondashishini ta’minlagan bo‘ladi. 

Murojaatda aytilishicha, bu bilan bir tarafdan ayrim tizimlarda yuz berayotgan ko‘zbo‘yamachilik, poraxo‘rlikning ham oldi olingan bo‘lardi. 

“Ishoning, agar biz “Parlament TV” telekanalini tashkil qiladigan bo‘lsak, bajarilayotgan ishlarning sifati ham yaxshi tomonga o‘zgarishni boshlaydi. Bu telekanal orqali partiyalarning bajarayotgan ishini mamlakatimiz aholisiga, shuningdek, chet el jamoatchiligiga ham keng ko‘lamda yetkazib boramiz. Har bir jarayonning mazmun-mohiyatini izchil va tizimli ochib berish orqali jamiyatimizda vatanparvarlik hissini shakllantirgan bo‘lamiz. Xalq saylovda ovoz bergan deputatining qilgan ishlarini ko‘rib, u bilan g‘ururlanishni boshlaydi yoki aksincha...

“Parlament TV” telekanali orqali xalq bilan deputatlar orasida “munozara maydoni”ni yaratgan bo‘lamiz. Xalq bilan deputatlar orasidagi befarqlik, loqaydlikni oldini olgan bo‘lamiz. Muhim masalalarni ochiq muhokama qilish uchun keng jamoatchilik vakillari bilan teledebatlar o‘tkazilsa ham nur ustiga nur bo‘lar edi”, deb yakunlanadi murojaat. 

Izohlarda esa fuqarolarning Alisher Qodirovni gaplaridan keyin parlamentga nisbatan hafsalasi pir bo‘lgani aytilgan.