5 yashar qizining jasadini yoqib, so‘ng daryoga tashlagan onaga sud hukmi o‘qildi

Bundan 10 oy avval Toshkentda er-xotin 5 yoshli qiz farzandini vahshiylarcha o‘ldirib, uning jasadini yoqib, daryoga tashlab yuborgani haqida xabar bergan edik. Ular farzandi savdo majmuasida yo‘qolib qoldi deb, huquq-tartibot organi xodimlarini chalg‘itishga uringandi.

Mazkur jinoyat bo‘yicha sud hukmi e’lon qilindi. Bu haqda MY5 telekanali lavhasida ma’lum qilindi. 

Sud ma’lumotiga ko‘ra, 2019 yil 24 oktyabr kuni tushdan so‘ng ona birinchi turmushidan bo‘lgan 5 yoshli qizi ikkinchi turmushidan bo‘lgan 1,5 yoshli bolasining boshini hojatxona suviga solayotganini ko‘rib qolgan. Jahli chiqqan ona bor kuchi bilan bolani mushtlab urib, irg‘itib yuborgan.

“Qizaloq boshi bilan devor burchagiga urilgan. Tabiiyki og‘riqdan yig‘lashni boshlagan. Ona esa uni o‘qlov bilan urishda davom etib, jazolagan. Qizaloq keyinchalik onasidan “og‘riyapti”, deb suv so‘ragan. Ayol bunga e’tibor qaratmasdan, uni qo‘llarini yuqoriga ko‘targizib burchakka turg‘izib qo‘ygan. Qiz xirillab, bo‘g‘ilib, nafas olishga qiynalayotganini ko‘rgan ona qo‘rqib ketib, turmush o‘rtog‘ini chaqirgan”, deyiladi xabarda.

Ayolning qo‘ng‘irog‘idan so‘ng uning sha’riy nikohidagi eri Sergelida ijarada yashab turgan uyiga tezda yetib kelgan. Soat 17:00 larda qizaloq olingan tan jarohatlari oqibatida o‘sha uyning o‘zida vafot etgan. Ayol eriga qamalib ketgudek bo‘lsa, yosh bola bilan qolib ketishini aytib, qizchaning jasadidan qutilishda yordam so‘ragan. Er rozi bo‘lgan.

So‘ngra ertasi kuni soat 05:00 lar atrofida Bo‘stonliq tumanidagi dala hovliga kelib, er-xotin jasadni o‘choqda yoqqan. Lekin jasad oxirigacha yonmagach, murda qoldiqlarini yo‘qotish uchun uni Chirchiq daryosiga oqizib yuborgan.

Qotillik o‘tganidan 10 kun o‘tib ona qizaloqning buvisi sabab IIBga murojaat qilishga majbur bo‘lgan.

Ma’lum bo‘lishicha, o‘tgan yillar davomida qotil ona shar’iy nikohdagi eri bilan Rossiyada yashab, ikki o‘g‘il farzandli bo‘lgan. 5 yoshli qizaloq esa buvisining uyida yashab kelgan. Jinoiy ishda sherik bo‘lgan er-xotin esa Toshkentga qaytganidan so‘ng qizchani buvisining qo‘lida o‘z tarbiyasiga olgan.

Qizaloq buvisining “nabiram qayerda?” degan so‘rovlaridan qochish va o‘z aybini yashirish maqsadida ayol Compass savdo markaziga borib, qizini yo‘qotib qo‘yganini bildirgan.

Tezkor-tergov guruhi tomonidan J.N. va uning shar’iy nikohdagi eri M.F.ning ko‘rsatmalari shubha ostiga olinib, qidiruv tadbirlariga qaramasdan, farzandi bir kun mobaynida topilmaganligi sababli u qotillik jinoyati qurboni bo‘lganligi gumoni asosida Jinoyat kodeksining 97-moddasi 1-qismi bilan jinoyat ishi qo‘zg‘atilgan. Oradan 10 oy o‘tib Jinoyat ishlari bo‘yicha Toshkent shahar sudida jinoyatchi er-xotinga nisbatan hukm o‘qildi.

Sud hukmiga ko‘ra, ayolga 13 yilga ozodlikdan mahrum qilish jazosi tayinlandi. Uning eri esa aybsiz deb topilib, reabilitatsiya qilingan hamda 5 yil muddatga ozodlikdan mahrum qilish jazosi tayinlangan.

Hukm o‘qilgan bo‘lsa-da, qotil ona o‘z aybini tan olmagan. 5 yoshli qizaloqning murda suyaklari ayolning onasiga dafn etish uchun berilgan.