Netanyaxu Bayden bilan barcha kelishmovchiliklarini hal qilishga umid qilmoqda

Isroil Bosh vaziri Binyamin Netanyaxu G‘azo sektori janubidagi Rafahda keng ko‘lamli operatsiya boshlansa, Vashington Isroilga qurol-yarog‘ yetkazib berishni to‘xtatadi, degan ochiq ogohlantirishidan so‘ng, AQSH Prezidenti Jo Bayden bilan barcha kelishmovchiliklarni bartaraf etishga umid qilmoqda. Bu haqda u “Merit Street Media” telekanaliga bergan intervyusida so‘z ochdi.

"Men Jo Baydenni ko‘p yillar davomida, 40 yoki undan ko‘proq vaqt davomida bilaman, bizda farqlar bor edi va biz ularni yengib o‘tishga muvaffaq bo‘ldik. Mamlakatimizni himoya qilish uchun nima qilishimiz kerak bo‘lsa, shuni qilamiz va bu kelajagimizni himoya qilish demakdir", deydi u.

Qayd etish joizki, AQSH Prezidenti Jo Bayden 8 may kuni CNN telekanaliga bergan intervyusida G‘azo sektoridagi Rafah shahrida yirik harbiy operatsiya o‘tkazilsa, AQSH Isroilga qurol yetkazib berishni to‘xtatishini aytgan. Shu kuni AQSH Mudofaa vaziri Lloyd Ostin Vashington Rafah atrofidagi vaziyat munosabati bilan Isroilga qisqa muddatli harbiy yordamning ayrim turlarini ko‘rib chiqayotganini tushuntirdi. Uning bayonotlaridan ma’lum bo‘lishicha, yuqori quvvatli bombalarni yetkazib berish to‘xtatilgan. Pentagon rahbarining so‘zlariga ko‘ra, ta’minot bo‘yicha yakuniy qarorlar qabul qilinmagan. Davlat departamentining aniqlik kiritishicha, Isroilga faqat bir partiya o‘q-dorilar yetkazib berish to‘xtatilgan bo‘lsa-da, boshqa harbiy yuklar ham ko‘rib chiqilmoqda.

"Bu pauza. Biz ma’lum bir ta’minot bo‘yicha pauza haqida gapiryapmiz. Bu qurol-yarog‘ yetkazib berishni to‘xtatish emas, balki pauza", degan Oq uy matbuot kotibi Karin Jan-Per.

Netanyaxu esa Isroil armiyasi Falastinning HAMASning 24 ta batalonidan 20 tasini yo‘q qilganini aytgan. 

“Biz 24 ta HAMAS terror batalonidan 20 ga yaqinini yo‘q qilishga muvaffaq bo‘ldik, biz Rafaxda yana 4 tasini yo‘q qilishimiz kerak, shuning uchun biz ularni o‘sha yerda qoldira olmaymiz”, degan Bosh vazir.

Shu bilan birga, Netanyaxu Rafahdagi operatsiya davomida Isroil “juda kuchli qarshilikka duch kelishini” tan oldi, biroq isroillik harbiylar buni yengib o‘tishiga ishonch bildirdi.