O‘zbekiston yana bir xalqaro shartnomaga qo‘shildi
Jamiyat
−
26 Sentabr 2019 2451
Bugun, 26 sentyabr kuni Turg‘un organik ifloslantiruvchi moddalar haqidagi Stokgolm konvensiyasi O‘zbekiston Respublikasi uchun kuchga kirdi. Hujjat 2001 yil 22 mayda Stokgolm shahrida qabul qilingan. Bu haqda O‘zbekiston Respublikasi Tashqi ishlar vazirligi xabar bermoqda.
Bugungi kunda 183 ta mamlakat ushbu Konvensiyaning ishtirokchisi hisoblanadi.
Ushbu xalqaro shartnomaning maqsadi aholi salomatligi va atrof-muhitni Turg‘un organik ifloslantiruvchi moddalar (TOIM) ta’siridan himoya qilishdir.
Konvensiya qoidalariga muvofiq, tomonlar TOIM ishlab chiqarish, import qilish, eksport qilish, ko‘mish va ulardan foydalanishni nazorat qilishni, shuningdek, mavjud TOIMni almashtirish uchun qo‘llash mumkin bo‘lgan eng yaxshi texnologiyalar va usullardan foydalanishga ko‘maklashish majburiyatini zimmalariga oladilar.
O‘zbekiston Respublikasining Konvensiyadagi ishtiroki TOIM bilan bog‘liq ekologik vaziyatni yaxshilash, aholi, atrof-muhit, o‘simlik va hayvonot dunyosiga ehtimoliy salbiy oqibatlarini oldini olish imkonini beradi.
Live
Barchasi