Тошкент ва Самарқандда адвокатлар пора билан қўлга олинди (видео)
3-саҳифа
−
07 Апрель 9185
Тошкент ва Самарқанд шаҳарларида ўзи эгаллаб турган мансабни суиистеъмол қилган ҳолда, судланган шахсларга нисбатан белгиланган жазо муддатини енгиллаштириб беришни ваъда қилган адвокатлар қўлга олинди. Бу ҳақда бугун, 7 апрель куни Давлат хавфсизлик хизмати (ДХХ) матбуоти хабар берди.
Қайд этилишича, Тошкент шаҳридаги адвокатлик бюроси адвокати ва қурилиш соҳасида фаолият юритувчи МЧЖ юристи ўзаро келишган ҳолда, суд тизимида юқори лавозимда ишловчи танишлари орқали, 2021 йилда Жиноят Кодексининг 131 ва 135-моддалари билан судланиб, 8 йил 6 ой муддатга озодликдан маҳрум қилинган ва ҳозирда жазо муддатини ўтаётган шахснинг айбловидан 135-моддани олиб ташлаш орқали, унга нисбатан тайинланган жазони енгилроқ жазо турига алмаштириб бериш эвазига 75 минг АҚШ доллари талаб қилишади. Сўралган пул маблағини олган вақтларида ДХХ ходимлари томонидан ашёвий далиллар билан ушланди.
Билдирилишича, мазкур адвокат 2015-2020 йилларда фуқаролик ишлари бўйича Бекобод туманлараро судининг судьяси бўлиб, МЧЖ юристи эса 1999-2003 йилларда жиноят ишлари бўйича Бухоро вилоят суди ходими сифатида фаолият юритган.Бошқа ҳолатда эса, муқаддам фирибгарлик билан боғлиқ жинояти учун судланган, Тошкент шаҳридаги адвокатлик фирмаси адвокати суд органларидаги танишлари орқали, узоқ муддатга озодликдан маҳрум этилган маҳкумнинг жазосини озодликдан маҳрум қилиш билан боғлиқ бўлмаган бошқа жазога алмаштириб бериш эвазига 17 минг АҚШ доллари олган вақтида Давлат хавфсизлик хизмати ходимлари томонидан ашёвий далиллар билан ушланган.
Самарқанд шаҳридаги адвокатлик ҳайъати адвокати шаҳар прокуратураси иш юритувидаги жиноят иши бўйича гумонланувчи шахсга нисбатан қамоққа олиш тарзидаги эҳтиёт чорасини қўлламасликлари учун, прокуратура тизимидаги танишлари орқали ёрдам бериш эвазига 2 минг АҚШ доллари талаб қилиб, 1,5 минг АҚШ доллари олган вақтида ДХХ ҳамда прокуратура органлари ходимлари томонидан ашёвий далиллар билан ушланган.
Ҳозирда мазкур шахсларга нисбатан Жиноят Кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, қамоқ эҳтиёт чораси қўлланилган.
Эслатиб ўтамиз, жорий йилнинг 29 февраль куни адвокат З.Я. судьяга пора бераётганда Қорақалпоғистон Республикаси ҳуқуқни муҳофаза қилувчи органлари томонидан қўлга олинган эди.
Live
Барчаси
