Венесуэла АҚШга ён бермоқчими?

Венесуэла АҚШ билан музокаралар ўтказишга тайёрлигини билдирди. Бу ҳақда мамлакат ташқи ишлар вазири Хорхе Арреаса маълум қилди.

Арреаса АҚШнинг Венесуэла бўйича стратегияси муваффақиятсизликка учраган деб ҳисоблаяпти. Шу билан бирга у расмий Вашингтон билан алоқаларни яхшилашга тайёрлигини билдирган. 

“Дипломатия вақти келди, биз дипломатияга қайтиб, музокаралар столига ўтиришга ва бир-биримизни ҳурмат қилишга тайёрмиз”, деган вазир.

Арреаса Вена конвенциясининг 45-моддасига кўра, давлатларнинг дипломатик алоқалари бузилган вақтда мамлакат ўз элчихонаси ҳимоясини учинчи давлатга ишониши мумкинлигини қайд этган. Унинг сўзларига кўра, АҚШ Каракасдаги элчихонаси хавфсизлигини Швейцарияга ишониб топширган, Венесуэла эса ўз элчихонаси ҳимояси хавфсизлигини Туркияга ишонган.

Эслатиб ўтамиз, Венесуэладаги вазият жорий йилнинг 23 январида кескин тус олди. Мухолифат етакчиси Хуан Гуайдо оммавий норозилик намойишлари давом этаётган бир пайтда ўзини вақтинчалик президент деб эълон қилди. Уни АҚШ, Лотин Америкаси ва Европанинг қатор давлатлари тан олди. Россия, Туркия, Хитой амалдаги Президент Николас Мадурони қўллаб-қувватлади. Апрель ойи охирида Гуайдо давлат тўнтаришининг якуний босқичини ўтказишга уриниб, муваффақиятсизликка учради.