Қирғизистонда коронавирусга чалинганлар сони ортди

Бугун, 21 март куни Қирғизистон Республикасида яна 6 нафар беморда коронавирус ҳолати аниқланди. Бу ҳақда Республика соғлиқни сақлаш вазирининг ўринбосари Толо Исоқов эрталаб бўлиб ўтган брифингда маълум қилди.
⠀
Таъкидланишича, Боткен туманида 1 та, Сузак вилоятида 5 та ҳолат аниқланган. Шу билан Қирғизистонда коронавирусга чалинганларнинг умумий сони 12 кишига етди. Толо Исоқов беморларнинг барчаси шифокорлар назоратида эканлигини маълум қилган.

Эслатиб ўтамиз, жорий йилнинг 18 март куни Қирғизистоннинг Жалолобод вилоятида уч кишида COVID-19 коронавирус инфекцияси аниқланди. Касалланганларнинг барчаси Саудия Арабистонидан қайтгани маълум бўлди. Сўнгра, жорий йилнинг 20 март кунида яна 3 кишида ҳам ушбу инфекция аниқланган.

Сўнгги маълумотларга кўра, дунё бўйлаб коронавирусга чалинганлар сони 276 665 нафарга етди. Бу касаллик туфайли 11 419 киши вафот этди. Беморлардан 7 914  нафари ёки 5 фоизининг аҳволи оғир. Шу кунгача касаллик юқтирганларнинг 91 954 нафари бу вирусдан тузалган.