“Барселона” устидан қозонилган ғалаба Мбаппенинг “Реал”га ўтиш қарорига таъсир қиладими?

“Барселона” устидан қозонилган ғалаба ПСЖ ҳужумчиси Килиан Мбаппенинг “Реал”га ўтиш қарорини ўзгартирмайди. Бу ҳақда футболчининг ўзи X саҳифасида маълум қилди.

25 ёшли футболчи 2024 йилнинг февраль ойининг биринчи ҳафтасида “Реал” билан шартнома имзолаган. Футболчининг клуб билан шартномаси 5 йилга мўлжалланган.

Шунингдек, Мбаппе ёзда Мадридга ўтганидан сўнг беш йил давомида жами 225 миллион евро ишлаб олади ва француз форварди эркин агент сифатида “қироллик клуби”га ўтгани учун тахминан 150 миллион евро бонусга эга бўлади.

Маълумот учун, Мбаппе 2017 йилдан бери ПСЖда ўйнаб келмоқда. 25 ёшли футболчи парижликлар билан 13 та соврин ютган. Жорий мавсумда форвард барча турнирларда 42 та ўйин ўтказиб, 41 та гол урди ва 2 та голли узатмага муаллифлик қилди. Футболчининг француз клуби билан шартномаси шу йилнинг июнь ойи охиригача амал қилади. “Transfermarkt” интернет порталига кўра, футболчининг нархи 180 миллион еврони ташкил қилади.