Asabiy kechgan o‘yinda O‘zbekiston Yamanni mag‘lub etdi

Sport 27841
image

JCH-2022 ikkinchi saralash bosqichi 9-turi doirasida O‘zbekiston milliy terma jamoasi Yaman terma jamoasiga qarshi maydonga tushdi. Unda o‘zbekistonliklar kichik hisobda g‘alaba qozondi.

Saudiya Arabistonining Ar-Riyod shahrida o‘tgan bahsni hujumkor boshlagan O‘zbekiston MTJ 19-daqiqada Ibrohimxalil Yo‘ldoshevning ishlagan penaltisidan keyin hisobni ochish imkoniyatiga ega bo‘ldi. 11 metrlik jarima zarbasini Jaloliddin Masharipov golga aylantirdi — 0:1.

Ikkinchi bo‘limda ehtiyotkor hamda asabiy futbol ko‘rsatgan Vadim Abramov shogirdlari 81-daqiqada yana bir marta penalti tepish imkoniyatiga ega bo‘ldi. Zaxiradan maydonga tushgan Vagiz Galiulinga nisbatan ishlatilgan qo‘pollikdan keyin belgilangan 11 metrlik jarima zarbasidan Odil Ahmedov unumli foydalana olmadi — darvozabondan seyv.

Yakunda minimal hisobdagi g‘alabani saqlab qolgan O‘zbekiston terma jamoasi ochkolari sonini 15 taga yetkazib, guruhda ikkinchi o‘rinda qoldi. Yaman esa 5 ochko bilan so‘nggi, beshinchi pog‘onani egallab turibdi. 

So‘nggi, 10-tur doirasidagi Saudiya Arabistoni hamda O‘zbekiston uchrashuvidan keyin guruh g‘olibi nomi ma’lum bo‘ladi. Bahs 15 iyun, seshanba kuni o‘tkaziladi.

Abdulla Mannonov
Maqolaga baho bering
Baholaganlar: 1297
Reyting: 3
t
×