Harbiy tavsiyanomaga ega abituriyentlar masalasi hal etildi

Jamiyat

image

Joriy yilda oliy ta’lim muassasalariga kirish imtihonlari javobi chiqqanidan keyin harbiy qism qo‘mondonligi tavsiyanomasiga ega ko‘plab abituritentlar o‘qishga kira olmay qolgani ma’lum bo‘ldi. Ular norozi bo‘lib Davlat test markazi binosi oldiga to‘plandi.

Davlat test markazi harbiy qism qo‘mondonligi tavsiyanomasi bo‘lgan abituriyentlar bo‘yicha masalasida ma’lumot berdi.

Unga ko‘ra, harbiy qism qo‘mondonligi tavsiyanomasiga ega jami 13 107 nafar abituriyent oliy ta’lim muassasalarining bakalavriat ta’lim yo‘nalishlariga o‘qishga kirish uchun ro‘yxatdan o‘tgan bo‘lib, mas’ul vakolatli organlar tomonidan dastlabki tekshirish natijalariga ko‘ra, 1828 nafar abituriyentning harbiy qism qo‘mondonligi tavsiyanomasi tasdiqlanmagan edi.

Mas’ul vakolatli organlar hamda tegishli vazirlik va idoralar bilan qayta tekshirish natijalariga ko‘ra, 1828 nafar abituriyentdan 1516 nafari harbiy qism qo‘mondonligi tavsiyanomasiga ega ekanligi, 172 nafari safarbarlik chaqiruv rezervida xizmat qilganligi, 85 nafari harbiy xizmatni o‘tamaganligi va 55 nafari muddatli harbiy xizmatni o‘taganligi, lekin harbiy qism qo‘mondonligi tavsiyanomasiga ega emasligi aniqlangan.

DTM tomonidan tavsiyanomasi tasdiqlangan abituriyentlarning test sinovida to‘plagan ballari asosida tanlov natijalari (har bir ta’lim shakli va oliy ta’lim muassasasi kesimida) hisoblanganda 1516 nafar abituriyentdan 128 nafari davlat grantiga, 478 nafari to‘lov-kontraktga o‘tish ballariga teng yoki undan yuqori (ro‘yxatdan o‘tishda tanlangan 1-oliy ta’lim muassasasida imtiyoz doirasida o‘tish baliga nisbatan) ball to‘plaganligi ma’lum bo‘lgan.

Ushbu masala O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasining navbatdagi majlisida ko‘rib chiqilib, tegishli vazirlik va idoralar bilan kelishilgan holda abituriyentlarning huquqlarini himoya qilish maqsadida Davlat komissiyasining 6-son bayoni bilan mazkur abituriyentlarning 128 nafari davlat granti asosida, 478 nafari esa to‘lov-kontrakt asosida talabalikka tavsiya etildi.

Hozirda talabalikka tavsiya etilgan abituriyentlarning qaydnomasi oliy ta’lim muassasalariga taqdim etilmoqda.

Talabalikka tavsiya etilgan abituriyentlar o‘z natijalarini shaxsiy kabinetlari (abitur.dtm.uz) orqali ko‘rishlari mumkin.


Maqola muallifi

Teglar

OTM abiturient harbiy tavsiyanoma

Baholaganlar

91

Reyting

2.9

Maqolaga baho bering

Doʻstlaringiz bilan ulashing