Европа Россиянинг эҳтимолий “зарба”сига тайёрланмоқда

Олам

image

Европа комиссияси Россия газининг иттифоқ мамлакатларига импорти бутунлай тўхтатилган тақдирда кўриладиган чора-тадбирлар режасини тайёрламоқда. Бу ҳақда Энергетика бўйича Европа комиссари Кадри Симсон “Financial Times” газетасига берган интервьюсида маълум қилди.

“Биз ЕИга аъзо ҳар қандай давлат кейинги [газ таъминотидан узилиши] мумкин бўлган вазиятга дуч келдик”, дейди Европа комиссари.

Қайд этилишича, “Газпром” аллақачон Польша, Болгария ва Финляндияга газ етказиб беришни тўхтатиб қўйган, чунки улар ҳисоб-китобларда рублга ўтишдан бош тортган.

Европа Россиядан газ импортини бутунлай тўхтатишга тайёрланмоқда

Еврокомиссия томонидан ишлаб чиқилган режалар билан таниш бўлган нашр манбаларининг аниқлик киритишича, гап истеъмолнинг 27 фоизини ташкил этувчи саноат корхоналарига газ етказиб беришни уй хўжаликлари фойдасига ставкалаш ҳақида кетмоқда.

Симсоннинг тушунтиришича, Европа Иттифоқи имкон қадар кўпроқ газ жамғаришга ва Россиядан етказиб берилаётган таъминотни муқобилига алмаштиришга ҳаракат қилмоқда. Бу йил ЕИ рекорд ҳажмдаги суюлтирилган газни олди, бу эса ер ости резервуарларини тўлдириш имконини берган: 25 майга қадар улар бир йил аввалги 36 фоизга нисбатан 44 фоизга тўлдирилган.

Европа комиссари Россия газ импортининг учдан икки қисмини муқобил етказиб бериш билан алмаштириши мумкинлигини айтган.

“Украинадаги урушдан олдин Европа Иттифоқига етказиб бериладиган газнинг 40 фоизи Россия ҳиссасига тўғри келган. Энди бу улуш 26 фоизга тушиб кетди ва ЕИ ўз олдига йил охиригача бу кўрсаткични 13 фоизга камайтиришни мақсад қилиб қўйди”, дейди Симсон.

Унинг айтишича, Брюссель АҚШ ва Норвегиядан кўпроқ газ кутмоқда, шу билан бирга янги етказиб берувчилар билан музокаралар олиб боряпти. 

“Биз Миср ва Исроил билан ишлаяпмиз ва улар билан ёзгача икки томонлама келишувларга эришишга умид қиламиз. Биз Жазоир билан энергия бўйича мулоқотимизни давом эттиришни режалаштирмоқдамиз”, дейди у.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин

Баҳолаганлар

13

Рейтинг

3.2

Мақолага баҳо беринг

Дўстларингиз билан улашинг