“Уруш бадалини оддий одамлар ўз ҳаёти билан тўлайди”. Зеленский рус тилида мурожаат йўллади

Олам

image

Украина Президенти Владимир Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. 

Президент Зеленский видеомурожаат аввалида украинларга Ғарб давлатлари раҳбарлари билан бўлиб ўтган сўнгги музокаралар ҳақида маълумот берган. Кейинги фикларини рус тилада давом эттириб, рус қўшинларининг икки давлат ўртасидаги чегарани кесиб ўтиши “катта уруш” бошланишига сабаб бўлишини айтган.  

Икки тилдаги мурожаатда Зеленский Россия Президенти Владимир Путин билан телефон орқали гаплашишга уринганини маълум қилган. 

“Натижа – сукунат, гарчи сукунат Донбассда бўлиши керак бўлса ҳам”, дейди у. 

Шунингдек, Зеленский россияликларга Президент эмас, балки Украина фуқароси сифатида мурожаат қилаётганини урғулаган. Унинг эслатишича, Россия ва Украина 2 000 километрдан ортиқ умумий чегарага эга – “сизнинг қўшинларигиз бугун унинг ёнида турибди”, деган у. Унга кўра, булар 200 мингга яқин ҳарбий хизматчи ва кўплаб ҳарбий техникалардир. 

“Сизнинг раҳбариятингиз уларнинг бошқа давлат ҳудудига қадам қўйишини маъқуллади ва бу қадам катта урушнинг бошланиши бўлиши мумкин”, дея огоҳлантирган Украина раҳбари. 

Зеленскийга кўра, “руслар ва украинлар бир-биридан фарқ қилади, лекин бу душман бўлиш учун сабаб эмас”. 

“Украина халқи, ҳукумати тинчликни хоҳлайди ва қўлидан келганини қилади. Уруш – бу катта муаммо, бунинг учун сиз яқинларингиз ва ўз ҳаётингиз билан бадал тўлашингиз керак. Уруш барчани кафолатидан маҳрум қилади, ҳеч ким хавфсизлик кафолатига эга бўлмайди. Бундан ким кўпроқ азият чекади? Одамлар”, дейди Президент. 

Аввалроқ, Россия Президенти Владимир Путин Украина шарқида Донбассда рус ҳарбийлари махсус ҳарбий операция бошлаганини эълон қилганди. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади. 

Украина ИИВ маслаҳатчиси эса Киев ва Харьковга ракета ҳужуми уюштирилганини маълум қилди. Президент Зеленский мамлакатда ҳарбий ҳолат эълон қилди. 

Эслатиб ўтамиз, 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. 

Путиннинг фавқулодда қарори ортидан АҚШ Президенти Жо Байден айрим шахсларнинг мулкини блоклаш ва айрим операцияларни тақиқловчи фармон қабул қилди. Ҳужжат ДХР ва ЛХРга сармоя киритишни, шунингдек, ушбу минтақалардан ҳар қандай товарлар, хизматлар ёки технологияларни Қўшма Штатларга импорт қилишни тақиқлайди. 

Бундан ташқари, ушбу фармон ўзини мустақил деб эълон қилган республикаларда ҳаракат қилишга қарор қилган ҳар қандай шахсга нисбатан жазо чораларини қўллаш имконини беради. 

Қўшма Штатларда жойлашган ёки кейинчалик АҚШга кирадиган, ДХР ва ЛХР билан боғлиқ шахсларга тегишли бўлган барча мулк ва мулкдаги улушлар блокланади. 

Шунингдек, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.


Мақола муаллифи

Теглар

Россия-Украина уруши Украинага босқин

Баҳолаганлар

324

Рейтинг

3

Мақолага баҳо беринг

Дўстларингиз билан улашинг