Шойгу Ўзбекистонга “фашизмга қарши кураш” архив ҳужжатларини олиб келди

Россия Мудофаа вазири Сергей Шойгу Ўзбекистонга Иккинчи жаҳон уруши йилларида Ўзбекистон халқининг фашизмни енгишдаги ҳиссаси ҳақидаги архив ҳужжатларини олиб келди. Бу ҳақда у Бухорода, Ўзбекистон Мудофаа вазири Баҳодир Қурбонов билан музокараларда маълум қилди.

"Бизнинг учрашувимиз 1941-1945 йилларда бўлиб ўтган Улуғ Ватан урушидаги Ғалаба куни арафасида бўлиб ўтмоқда. Мен ўзбек халқининг умумий Ғалабага қўшган ҳиссаси тўғрисида архив ҳужжатларининг бир қисмини совға сифатида олиб келдим. Учрашувимиз охирида уларни топшираман", деган Шойгу. 

Эслатиб ўтамиз, кеча, 27 апрель куни Россия Федерацияси Мудофаа вазири, армия генерали Сергей Шойгу бошчилигидаги делегация Бухорога келганди. 

Аввалроқ, Бухорода икки мамлакат мудофаа вазирлари Сергей Шойгу ва Баҳодир Қурбонов томонидан 2021-2025 йилларда Россия ва Ўзбекистон ўртасида ҳарбий соҳадаги стратегик шериклик дастури имзолангани ҳақида хабар берилганди.