Россия ҳарбийлари Харьковга ҳужум қилмоқчи – Украина Қуролли Кучлари

Олам

image
0:00
0:00
download

Россия  ҳарбийлари Слобожанский йўналишида ҳужумга тайёргарлик кўришда давом этмоқдалар. Бу ҳақда Украина Қуролли Кучлари Бош штаби Facebook’даги саҳифасида маълум қилди.

“Слобожанский йўналишида душман ҳужумга тайёргарлик кўришда давом этмоқда, олдинга силжиш, Россия Федерацияси ҳудудидан қурол-яроғ ва ҳарбий техника етказиб беришнинг эҳтимолий йўлларини ўрганмоқда”, дейилади хабарда.

Қайд этилишича, Харьков йўналишида душман фаол ҳаракатлар ўтказмади. Улар Терний, Лозовая, Протопоповка, Руднево, Соколовка ва бошқа аҳоли пунктлари ҳудудларидаги фуқаролик инфратузилмасини ўққа тутган.

Шунингдек, Бош штаб маълумотларига кўра, душман Харьков вилоятидаги Довгенькага ҳужум қилишга уриниб кўрган.

“Славян йўналишида душман асосий кучини эгаллаб олган ҳудудлари ва таъминот йўлларини сақлашга, кейинги ҳужум учун шароит яратишга қаратмоқда. У Довгенька, Вернополье, Грушувах ва Большая Грушуваха аҳоли пунктлари ҳудудларида фуқаролик инфратузилмасини ўққа тутди. Ҳужумга уриниш бўлди, душман муваффақиятга эришмади, аввал эгаллаб турган позицияларига чекинди”, дейилади ҳарбий ҳисоботда.

Маълумотларга кўра, 30 май куни тушдан кейин Харьков ўққа тутилгани ҳақида хабарлар пайдо бўлган, гувоҳлар портлашлар бўлганини айтган. Кейинроқ уч нафар тинч фуқаро яралангани маълум бўлди.

Эслатиб ўтамиз, Харьков Россия ҳарбийларининг дастлабки нишонларидан бири эди. Узоқ давом этган ҳужумдан кейин руслар Харьковдан чекинганди. Жорий йилнинг 29 май куни эса Украина Президенти Владимир Зеленский шахсан Харьковга борганди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин

Баҳолаганлар

16

Рейтинг

3.4

Мақолага баҳо беринг

Дўстларингиз билан улашинг