Президент Шайхонтоҳурда оқсоқоллар билан дарахт ўтқазди

Жамият

image

Ўзбекистон Президенти Шавкат Мирзиёев бугун, 23 ноябрь куни Тошкент шаҳрининг Шайхонтоҳур туманидаги Сархумдон маҳалласига борди.

Вазирлик ва идораларни қуйи бўғинга тушириб, жойлардаги муаммоларни ҳал этиш, барча дастурларни маҳаллабай амалга ошириш – Шавкат Мирзиёевнинг энг асосий талаби.

Сархумдон маҳалласида ҳам иш шундай ташкил этилган. Ички йўллар, майдончалар обод қилинган. Яқинда бу ерда янги Маҳалла гузари қурилди. Савдо ва маиший хизмат шохобчалари, болалар ўйингоҳи, ҳарбий ватанпарварлик майдончаси ташкил этилди.

Маҳаллада 6 минг 500 нафардан ортиқ аҳоли яшайди. Бу ерда 45 та кўп қаватли уй, мактабгача таълим муассасаси ва хусусий мактаб бор. Ўндан ортиқ кичик бизнес корхонасида маҳаллий ёшлар ва аёллар ишламоқда.

Президент маҳалладаги шароитларни кўрди. Ҳарбий ватанпарварлик майдончаси билан танишув чоғида бу ерга аскар ва спортчиларни жалб этиб, ёшларни миллий ғурур ва мардлик руҳида тарбиялаш юзасидан тавсиялар берилди.

Маҳаллада “Яшил макон” лойиҳаси доирасида кўчатлар экилиб, мўъжаз боғ барпо этилган. Шавкат Мирзиёев маҳалла оқсоқоллари билан бирга ушбу боққа кўчатлар ўтқазди. Нуронийлар мамлакатга ҳамиша тинчлик, халққа фаровонлик тилаб дуо қилди.

Давлат раҳбари кутилмаганда Гулобод маҳалласига ҳам ўтиб, мавжуд ҳолатни кўздан кечирди, одамлар билан суҳбатлашди. 93 ёшли Анвархўжа ота Президентни дуо қилди. Маҳалладаги ўзгаришларни таъкидлаб, оталар чойхонаси қуриб беришни сўради. Шавкат Мирзиёев бу таклифни қўллаб-қувватлаб, отахонга мустаҳкам соғлик тилади.

Гулобод маҳалласида Шайхонтоҳур тумани Болалар ва ўсмирлар спорт мактаби ҳамда 41-умумтаълим мактаби жойлашган. Президентимиз мазкур мактабларни ҳам кириб кўрди, ўқитувчилар билан гаплашди.

“Кўраяпсизлар, таълим билан муаллимга шароит яратишга ҳаракат қилаяпмиз. Бугун бу ерга келиб, ўзимга кўп хулоса қилдим. Бу мактаб биносини ҳам янгилаймиз. Фанлар учун, спорт учун яхши шароитлар бўлади. Бугун бир тарихий кун бўлиб қолади”, деди Шавкат Мирзиёев.

Давлат раҳбари маҳаллалар аҳолиси билан мулоқот қилди.


Мақола муаллифи

Теглар

Шавкат Мирзиёев

Баҳолаганлар

63

Рейтинг

3.2

Мақолага баҳо беринг

Дўстларингиз билан улашинг