Президент 7 та вилоят ҳокимларини қатъий огоҳлантирди 

Жорий йилда 170 та йирик чорвачилик лойиҳалари ва хонадонларда кооперация орқали 249 та лойиҳани амалга ошириш белгиланган. Бу ҳақда Ўзбекистон Президенти Шавкат Мирзиёев аҳолини озиқ-овқат, жумладан, чорвачилик ва паррандачилик маҳсулотлари билан узлуксиз таъминлаш чора-тадбирлари юзасидан бўлиб ўтаётган видеоселектор йиғилишида маълум қилди.

Бунинг учун, февраль ойида қабул қилинган қарор билан чорвачилик хўжаликларига:

гўштнинг ҳар бир килограмми учун тўланадиган субсидия 2 минг сўмдан 4 минг сўмга, сутнинг ҳар бир литри учун 200 сўмдан 400 сўмга оширилди;

олиб келинадиган қишлоқ хўжалиги техникаси барча тўловлардан озод этилди;

соҳага 170 миллион доллар имтиёзли кредит линиялари очилди;

200 минг гектардан зиёд пахта ва ғалла майдонларига озуқабоп экинларни алмашлаб экиш белгилаб олинди.

Андижон, Бухоро, Фарғона ва Хоразм вилоятларида пахтачилик-тўқимачилик кластерлари томонидан амалий ишлар бошланиб, 18 минг бошли 35 та чорвачилик хўжаликлари ишга туширилган.

Лекин, Сурхондарё, Самарқанд, Сирдарё, Қашқадарё, Наманган, Жиззах ва Тошкент вилоятларида 35 минг бошли 70 та лойиҳа бўйича чорва комплексларини ишга тушириш кечикмоқда.

Шу сабабли, Президент ушбу вилоятлар ҳокимларини қатъий огоҳлантирган.