Қосим-Жомарт Тоқаев келаси ҳафта Ўзбекистонга келади

Олам

image

Ўзбекистон Республикаси Президенти Шавкат Мирзиёевнинг таклифига биноан Қозоғистон Республикаси Президенти Қосим-Жомарт Тоқаев жорий йилнинг 14 апрель куни икки кунлик давлат ташрифи билан Ўзбекистонга келади. Бу ҳақда Ўзбекистон Республикаси Президенти Матбуот хизмати хабар бермоқда.  

Давлат раҳбарлари Қосим-Жомарт Тоқаевнинг Қозоғистон Президенти лавозимига киришганидан илк бор учрашадилар. 

Тор ва кенгайтирилган таркибда ўтказилиши режалаштирилган музокараларда икки томонлама дўстлик, яхши қўшничилик ва стратегик шериклик муносабатларини янада кенгайтириш истиқболлари муҳокама қилинади, сиёсат, савдо-иқтисодиёт, инвестициялар, транспорт-коммуникация, маданий-гуманитар ва бошқа соҳалардаги ўзаро ҳамкорликнинг устувор йўналишлари кўриб чиқилади. 

Президентлар минтақавий ҳамкорликни мустаҳкамлаш ҳамда халқаро аҳамиятга молик муҳим масалалар юзасидан фикр алмашадилар. 

Давлат раҳбарларининг Қўшма баёнотини қабул қилиш, шунингдек, мамлакатлар ўртасидаги кўп қиррали муносабатларни ривожлантиришга қаратилган икки томонлама ҳужжатлар тўпламини имзолаш кўзда тутилган.

Президентлар қўшни қардош мамлакатда муваффақиятли якунига етган Ўзбекистон йилининг мантиқий давоми бўладиган Ўзбекистонда Қозоғистон йилининг расмий очилиш маросимида ҳам иштирок этадилар. Мазкур йил тадбирлари Қозоғистон санъат усталарининг концерти билан бошланади.

Эслатиб ўтамиз, Қосим-Жомарт Тоқаев Президент лавозимига киришгандан кейин илк ташрифини жорий йилнинг 3 апрель куни Россия Федерациясига амалга оширган эди. 
 


Мақола муаллифи

Теглар

Қосим-Жомарт Тоқаев

Баҳолаганлар

24

Рейтинг

2.9

Мақолага баҳо беринг

Дўстларингиз билан улашинг