Германия Президенти афғон инқирозида кўрсатилган ёрдам учун Мирзиёевга ташаккур изҳор этди

Жамият

image

Бугун, 30 август куни Ўзбекистон Республикаси Президенти Шавкат Мирзиёевнинг Германия Федерал Президенти Франк-Вальтер Штайнмайер билан телефон орқали мулоқоти бўлиб ўтди.

Суҳбат аввалида Германия Президенти давлат раҳбари ва Ўзбекистон халқини мамлакат мустақилликка эришганининг 30 йиллиги билан самимий табриклади. Кейинги йилларда Ўзбекистонда демократик янгиланишлар ва ижтимоий-иқтисодий ислоҳотларни амалга оширишдаги муваффақиятлар алоҳида қайд этилди.

Мунтазамлик касб этган олий даражадаги мулоқотнинг давоми сифатида икки томонлама ҳамкорлик масалалари юзасидан батафсил фикр алмашилди. Кўп қиррали муносабатларнинг бугунги даражасига юксак баҳо берилиб, истиқболдаги Ўзбекистон-Германия ҳамкорлигининг асосий йўналишлари белгилаб олинди.

Ўзаро савдо ва инвестицияларни кўпайтириш, ишбилармонлик ташаббусларини, Германиянинг Siemens, Bosch, Man, Claas, Knauf ва бошқа кўплаб етакчи компаниялари иштирокида юқори технологик тармоқлардаги саноат кооперацияси лойиҳалари ва инфратузилмани модернизация қилиш дастурларини қўллаб-қувватлашга алоҳида эътибор қаратилди.

Президентлар мамлакат мактаблари ва олий таълим муассасаларида немис тилини чуқур ўрганиш масалаларига алоҳида тўхталдилар. Ўзаро гуманитар алмашинувларни бундан буён ҳам фаол давом эттиришга келишиб олинди.

Давлат раҳбари Федерал Президентга республикада коронавирус инфекцияси тарқалишига қарши курашишда кўрсатилган техник-маслаҳат кўмаги учун самимий миннатдорлик билдирди.

Афғонистондаги вазият юзасидан ҳам фикр алмашилди. Франк-Вальтер Штайнмайер фуқароларнинг Ўзбекистон орқали транзит йўли билан эвакуация қилинишида кўрсатилган катта ёрдам учун яна бир бор ташаккур изҳор этди. Биргаликдаги инсонпарварлик операцияларини амалга ошириш учун яқин алоқаларни давом эттириш муҳим экани таъкидланди.

Ўзбекистон ва Германия Президентларининг телефон орқали мулоқоти ўзаро англашув руҳида ва дўстона муҳитда ўтди.

Эслатиб ўтамиз, Германия Афғонистондан ўз фуқаролари ҳамда Ғарбга ёрдам берган афғонистонликларни эвакуация қилишни тўхтатди. Қайд этиш керакки, ушбу жараёнда расмий Берлин Ўзбекистонга суянди. Ўз навбатида, расмий Тошкентнинг инсонпарварлик йўлида кўрсатган кўмаги учун Германия канцлери Ангела Меркель миннатдорлик билдирган.


Мақола муаллифи

Теглар

Баҳолаганлар

24

Рейтинг

2.9

Мақолага баҳо беринг

Дўстларингиз билан улашинг