“Азовсталь”даги ҳарбийлар Туркияга кетмоқчи – Пушилин

Мариуполнинг “Азовсталь” заводида блоклаб қўйилган украиналик ҳарбийлар уларни Туркияга қурол билан қўйиб юборишни сўрамоқда. Бу ҳақда Донецк халқ республикаси раҳбари Денис Пушилин хабар берди.

"Улар бизнинг армиямизга, рус ҳарбийларига юзланиб, қандай қилиб таслим бўлиш яхшироқ эканини савдолашишга ҳаракат қиляпти. Улар буни талаб қиляпти ёки сўраяпти. Улар Киевга ишонмайди. Яъни сўнгги илтимосларида эвакуация Киевга, Украина назорати остидаги томонга эмас, балки Туркияга қўйиб юборишни сўради, улар у ерда қуролсизланишга ҳам тайёр.  Албатта, бу бемаъни таклиф”, дейди Пушилин.

Жорий йилнинг 21 апрель куни Россия Мудофаа вазири Сергей Шойгу Владимир Путинга ҳарбий ҳаракатлар бўйича ҳисобот бериб, Мариуполнинг озод қилингани ва қолган жангчилар “Азовсталь”да тўсиб қўйилганини айтганди.

Эслатиб ўтамиз, жорий йилнинг 19 апрель куни Тан олинмаган Донецк Халқ Республикаси (ДХР) халқ милициясининг ҳарбий гуруҳлари Мариуполдаги “Азовсталь” заводи ҳудудига ҳужум бошлаганди. 

Сергей Шойгунинг Россия Президенти Владимир Путин билан учрашувда маълум қилишича, завод ҳудудида қолган тинч аҳоли учун гуманитар йўлаклар тайёрланган ва сукунат режими эълон қилинган, бироқ заводни ҳеч ким тарк этмаган. Унинг қўшимча қилишича, бир неча кун ичида заводга туташ ҳудудлардан юздан ортиқ одам эвакуация қилинган.

Шундан сўнг Путин “Азовсталь”га ҳужумни номақбул деб атаган ва уни бекор қилиб, саноат зонасини тўсиб қўйишни ва пашша ҳам учиб ўтиши йўл қўймасликни буюрган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.