Ўзбекистонга Волгабўйи ҳудудларидан нам ва совуқ ҳаво оқими кириб келади

Гидрометеорология хизмати маркази ҳафта давомида кузатиладиган об-ҳаво ҳақида маълумот берди.

Бугун кечга бориб Волгабўйи ҳудудларидан нам ва совуқ ҳаво оқими кириши муносабати билан об-ҳаво шароитлари ўзгаради. Булутлар кўпайиб, тунда мамлакатнинг шимолий туманларидан ташқари қолган ҳудудларида ёғингарчилик (ёмғир, қор) ёғади. Бундай шароит эртага кун бўйи давом этади. Эртага ҳаво ҳарорати кечаси 0-5 даража илиқ, кундузи 3-8 даража илиқ бўлади. 

Иш ҳафтасининг ўртасида совуқ ҳаво оқимининг таъсири, айниқса, кечаси ҳали сезилиб туради, тунги ҳарорат 1-3 даража совуққача пасаяди, кундузи қуёш пайшанбага келиб ҳароратни 10-15 даражагача илитади. 

Иш ҳафтасининг охирида об-ҳаво яна айнашни бошлайди. Жума куни мамлакат ҳудудининг катта қисмида ёмғир ёғади, шимолий туманларда ёғингарчилик бўлади, фақат Тошкент, Самарқанд, Жиззах, Сирдарё вилоятлари ҳамда Фарғона водийси вилоятларида ёғингарчилик кутилмайди. Тунги ҳарорат 0-5 даража илиққача кўтарилади, кундузи 10-15 даража атрофида бўлади, бундай ҳарорат ойнинг шу даври учун хос бўлган ўртача кўп йиллик қийматлардан бир оз юқори.