Петербург форум давомида яна ҳужумга учради (видео)

Украина дронлари бугун, 6 июнь куни эрталаб Санкт-Петербург ва Ленинград вилоятига ҳужум қилди. Бу ҳақда Украина Қуролли кучлари хабар берди.

Петербург губернатори Александр Беглов шаҳар аҳолисини “уйларида қолиш ва кўчага чиқмаслик”ка чақирган.

Ҳужум сабабли шаҳарда тунда ва эрталаб мобиль интернет ишида узилишлар қайд этилган.

Ленинград вилояти губернатори Александр Дрозденко эса ҳудуд устида 141 та учувчисиз учиш аппарати уриб туширилганини маълум қилган. Қолдиқлар Луга, Волосово ва Ломоносов туманларига тушган. Шунингдек, у Большая Ижора посёлкаси ҳудудида ёнғин чиққанини ҳам билдирган. У вайроналар кўламини аниқлаштирмаган.

Расмий маълумотларга кўра, ҳалок бўлганлар ва жароҳатланганлар йўқ.

Ломоносовдаги Денгиз иссиқлик техникаси илмий-тадқиқот институти (бу ерда сув ости қуроллари ишлаб чиқилади), Кронштадтдаги Кадет денгиз корпуси ҳамда Петергоф нефть базаси дронлар зарбасига учрагани айтилмоқда.

Эслатиб ўтамиз, Украина Петербург халқаро иқтисодий форумининг илк кунида Санкт-Петербург ва унга яқин ҳудудлардаги бир нечта инфратузилма объектларига ҳужум қилганди. Ҳужум оқибатида айрим объектлар шикастланган ва бир нечта одам жароҳат олган.

Шунингдек, Петербург нефть терминалида ёнғин юз берган. Ленинград вилоятида бир қатор дронлар уриб туширилгани ва ҳаво хавфи эълон қилингани қайд этилган. Пулково аэропортида парвозлар чеклангани ҳамда шаҳарда интернет ва алоқа узилишлари кузатилгани билдирилган.