ЕЧЛ янги мавсумида Германиянинг 5 та клуби иштирок этади
Спорт
−
02 Май 2222
Дортмунднинг “Боруссия” клуби Европа Чемпионлар лигаси (ЕЧЛ) биринчи ярим финал учрашувида ПСЖ устидан 1:0 ҳисобида ғалаба қозониб, келаси мавсум Бундеслиганинг 5 та жамоаси ЕЧЛда иштирок этишини таъминлади.
Коэффициент бўйича биринчи ўринни эгаллаган 2 та давлат кейинги мавсум учун ЕЧЛда қўшимча 5-ўринни қўлга киритади. Булар Италия ва Германия давлати бўлади. Италия ҳозир мавсум учун 19,428 очкога эга ва биринчи ўринда, Германиянинг коэффициенти эса 18,071 кўрсаткични ташкил қилмоқда.
Ҳозирда айнан “Боруссия” клуби ўз чемпионатида 5-ўринда бормоқда. Шу тариқа, “асаларилар”нинг ўзи Европа Чемпионлар лигаси йўлланмасини қўлга киритди. Бундан ташқари, дортмундликлар ЕЧЛда ғолиб бўлган тақдирда, Бундеслиганинг 6 та клуби Европа Чемпионлар лигасида иштирок этади.
Қайд этиш жоиз, келаси мавсумдан бошлаб Европа Чемпионлар лигаси бутунлай янги форматга ўтади. Одатдагидек гуруҳ босқичи ўрнига битта лигада 36 та жамоа ўйнайди, бунда ҳар бир жамоа турли рақибларга қарши 8 та ўйин ўтказади.
Live
Барчаси
