Shavkat Mirziyoyev “Rosatom” bosh direktorini qabul qildi

Jamiyat

009acf1b-a2a8-0ade-534a-2d79b7a09242

Bugun, 15 may kuni O‘zbekiston Respublikasi Prezidenti Shavkat Mirziyoyev Rossiyaning “Rosatom” atom energiyasi bo‘yicha davlat korporatsiyasi bosh direktori Aleksey Lixachyovni qabul qildi.

Davlat rahbari mehmonni qutlar ekan, atom energiyasidan tinch maqsadlarda foydalanish sohasidagi O‘zbekiston-Rossiya o‘zaro manfaatli hamkorligi izchil rivojlanib borayotganini katta mamnuniyat bilan qayd etdi.

Oliy darajada erishilgan kelishuvlarni ro‘yobga chiqarish doirasida ilg‘or texnologiya va bilimlarni jalb etgan holda O‘zbekistonda birinchi atom elektr stansiyasini qurish loyihasini tayyorlash va amalga oshirish bo‘yicha yaqindan hamkorlik qilinmoqda.

O‘zbekiston Respublikasi Vazirlar Mahkamasi huzurida “O‘zatom” agentligi tashkil etilgan va faoliyat yuritmoqda. Mamlakatimizda atom energetikasini rivojlantirish bo‘yicha o‘n yilga mo‘ljallangan konsepsiya qabul qilingan.

Bo‘lajak AES uchun maydon tanlash bo‘yicha muhandislik tadqiqotlarining birinchi bosqichi yakunlandi, xalqaro talablarga muvofiq loyihaning atrof-muhitga ta’siri baholanmoqda va texnik hujjatlar tayyorlanmoqda.

Aholini atom energetikasi va yadroviy texnologiyalarning rivoji to‘g‘risida keng xabardor qilish maqsadida bugun “O‘zatom” agentligi binosida Atom texnologiyalari axborot markazi ochildi.

Bundan tashqari, yangi o‘quv yilidan Toshkentda “MMFI” milliy tadqiqot yadroviy universitet filiali o‘z ishini boshlaydi.

Uchrashuvda mamlakatda qabul qilingan “yo‘l xaritasi” asosida AES qurilishi loyihasini sifatli tayyorlash va amalga oshirishni ta’minlash bo‘yicha hamkorlikni davom ettirish masalalari ko‘rib chiqildi. Mamlakatda yangi tarmoqni rivojlantirish uchun yuqori malakali kadrlarni tayyorlashga alohida e’tibor qaratildi.

“Rosatom” davlat korporatsiyasi bosh direktori Aleksey Lixachyov samimiy qabul uchun Shavkat Mirziyoyevga chuqur minnatdorlik bildirdi. Atom energiyasidan tinch maqsadlarda foydalanish sohasida erishilgan kelishuvlarni o‘z vaqtida va keng ko‘lamda amalga oshirish borasidagi intilish qat’iy ekani ta’kidlandi.


Maqola muallifi

Teglar

Shavkat Mirziyoev Rosatom AES

Baholaganlar

8

Reyting

2.8

Maqolaga baho bering

Doʻstlaringiz bilan ulashing