АҚШдаги отишма, тўхтатилган Умра зиёрати, мағлуб бўлган “Реал” – 26 февраль тунгги воқеалари

Жаҳон янгиликлари

АҚШ. Қўшма Штатларнинг Милуоки шаҳрида бўлган отишмада олти киши, жумладан, отишма содир этган шахс ҳам ҳалок бўлди. Полиция 51 ёшли гумондорни аниқлаган, аммо у аллақачон нобуд бўлган эди. Бундан ташқари, яна 5 кишининг жасади топилган. Воқеа пиво ишлаб чиқарадиган Molson Coors компанияси корхоналаридан бирида содир бўлган. 

Саудия Арабистони. Ҳукумат хорижликлар учун мамлакатга умра ибодати ва Муҳаммад салоллоҳу алайҳи васалламнинг Мадинадаги масжидларига зиёрат учун келишни вақтинчалик тўхтатди. Бундан ташқари, коронавирус аниқланган мамлакат фуқароларига виза бериш ҳам тўхтатилиши ҳам маълум бўлди.

Руминия. Мамлакат ССВ давлат котиби Хорациу Молдованнинг маълум қилишича, 26 февраль тунида мамлакатда илк коронавирусга чалиниш ҳолати қайд этилди. Фуқаро Италиядан келганлиги аниқланган. Унда вирус аниқлангангунга қадар, карантинда сақланган.

Сурия. Мамлакат армияси Идлиб жанубидаги бир қанча аҳоли пунктларини террорчилардан озод қилди. Аниқ маълумотларга кўра, Сфухен, Кафр-Муса, Фулейфиль, Каукаба ва Кафр-Увейд қишлоқлари жангарилардан тозаланган.

Буюк Британия. Ғарбий авиация манбалари хабар беришича, Британия Қироллик ҳаво кучларининг навбатчилик билан шуғулланадиган Typhoon ("Тайфун") самолёти 26 февраль куни Россиянинг стратегик бомбардимончиси Ту-95’ни қарши олиш учун Лоссимут авиабазасидан ҳавога кўтарилди. Узоқ давом этган патрулдан сўнг, британ самолётлари рус бомбардимончиларининг учишини кутмасдан ўз базаларига қайтишган.

Ўзбекистон хабарлари

Самарқанд шаҳрида Австрия Республикаси ва Самарқанд вилояти ишбилармон доиралари вакиллари иштирокида бизнес-форум бўлиб ўтди. Унда вилоятнинг иқтисодий салоҳияти, мавжуд ресурслар тўғрисидаги тақдимот намойиш этилди. Шундан сўнг, Австриядан келган 30 дан ортиқ компания вакиллари қурилиш, туризм, нефть-кимё, гўшт ва сутни қайта ишлаш, темир йўл, иситиш ва совутиш тизимлари, автомобиллар учун эҳтиёт қисмлар тайёрлаш, қоғоз ишлаб чиқариш, гидроэлектр станциялари учун ускуналар, канализация ва чиқиндиларни тозалаш ва қайта ишлаш, тиббиёт ва бошқа йўналишларда ҳамкорлик қилиш учун ўз хизматларини таклиф этди.

2015-2019 йиллар оралиғида Ўзбекистондаги меҳрибонлик уйлари ва болалар шаҳарчаларида жами 1112 нафар битирувчи ўқишни тамомлагани маълум қилинди. Шулардан, 449 нафар уй-жой билан таъминланган, 481 нафари ишлик бўлган, 86 нафари ОТМга ўқишга кирган, 51 нафари ишлаш учун хорижга кетган ва 45 нафар бола тарбияси билан банд.

Ўзбекистонда 2020 йилда автомобиль импорт қилиш ҳажми кескин қисқаргани маълум бўлди. Хабарларга кўра, 2020 йилнинг январь ойида Республикага импорт қилинган автомобилларнинг қиймати 25,5 миллион долларни ташкил қилган. Бу 2019 йил январь ойидагига қараганда 28,4 миллион долларга камроқни ташкил этган.

Футбол. Чемпионлар лигаси

26 февраль куни Чемпионлар Лигаси чорак финалидан ўрин олган дастлабки баҳслар якунланди. “Реал” ўз уйида Англиянинг “Манчестер Сити” жамоасини қабул қилди. Муросасиз кечган учрашувда мадридликлар 1:2 ҳисобида мағлубиятга учрашди.
Иккинчи учрашувда эса Италиянинг “Ювентус”и эса Францияда “Лион”га кичик ҳисобда имкониятни бой бериб қўйди – 1:0.

Европа лигаси

Мусобқанинг дастлабки нимчорак финалчиси номи маълум бўлди. Португалиянинг “Брага” жамоаси майдонида меҳмон бўлган Шотландиянинг “Рейнжерс” клуби Кент томонидан урилган ягона гол ҳисобига ғалаба қозонди – 0:1.