Президент Нурафшонда қуришдан аввал қилинадиган ишларни белгилаб берди

Ўзбекистон Республикаси Президенти Шавкат Мирзиёев Тошкент вилояти Нурафшон шаҳрида бош режа асосида амалга ошириладиган лойиҳалар билан танишди.

Маълумки, 2017 йили Тошкент вилояти маркази ушбу шаҳарга кўчирилган, ўтган йили унинг бош режаси ишлаб чиқилган эди. Бугунги кунда бунёдкорлик ишлари олиб борилмоқда. Тошкент йўли кўчаси кенгайтирилиб, бир қаватли эски иморатлар ўрнида кўп қаватли уйлар, офислар, савдо ва хизмат кўрсатиш шохобчалари қурилмоқда. Йил охиригача 8 та банк филиали ва 9 та маъмурий бино фойдаланишга топширилади.

Давлат раҳбарига бош режага асосан шаҳарнинг марказий қисмини батафсил режалаштиришга оид маълумотлар берилди. Унга мувофиқ, бу ерда Тошкент вилояти ҳокимлиги, вазирлик ва идоралар бошқармалари, маданият объектлари, университет ва мактаблар, шифохона, спорт мажмуалари бўлиши режалаштирилган. Кўп қаватли уйлар энергия тежайдиган материаллардан қурилиши кўзда тутилган.

Президент биринчи навбатда инфратузилма тармоқларини мустаҳкам қилиб қуриш лозимлигини таъкидлаб, уларни сифатли эксплуатация қиладиган мутахассислар тайёрлаш, вазирлик ва идоралар биноларини оптимал жойлаштириш бўйича топшириқлар берди.