Навоийда синглиси ва хотинига зўравонлик қилган 2 эркак жазоланди

Навоий вилоятининг Кармана ва Учқудуқ туманларида ўз оила аъзоларига тазйиқ ўтказиб, уларга зўравонлик қилган икки эркак жавобгарликка тортилди. Бу ҳақда Навоий вилоят Ички ишлар бошқармаси маълум қилди.

Қайд этилишича, Кармана туман тиббиёт бирлашмаси ҳамшираси Кармана туман ИИБга телефон орқали мурожаат этиб, 1999 йил туғилган, Кармана тумани “Фарҳод” МФЙда истиқомат қилувчи қиз К.Л. тан жароҳати олган ҳолда шифохонага ётқизилганлигини маълум қилган.

Туман ИИБ олиб борган суриштирув натижасида аниқланишича, К.Л. бирга яшовчи 1989 йил туғилган ўгай акаси Ш.Б. томонидан калтакланган. Ш.Б. ўзаро оилавий келишмовчиликлар натижасида бир неча бор қизга зўравонлик ва тазйиқлар ўтказиб келган. Туман ИИБ томонидан Ш.Б. Маъмурий жавобгарлик тўғрисидаги кодекснинг 52-моддасига асосан жавобгарликка тортилган.

Вилоят ИИБ томонидан хабар берилишича, Учқудуқ тумани Ўзбекистон кўчасида яшовчи, 1988 йилда туғилган яна бир фуқаро А.Ю. Учқудуқ тумани ИИБга ариза билан мурожаат қилган. У турмуш ўртоғи, 1982 йилда туғилган З.Д. билан ўзаро оилавий келишмовчилик натижасида муросага кела олмаётганлигини, турли важлар билан калтакланиб, тан жароҳати олганлигини маълум қилган.

Учқудуқ тумани ИИБ томонидан кўрилган чоралар натижасида, З.Д. айбдор деб топилиб, Маъмурий жавобгарлик тўғрисидаги кодекснинг 52-моддасига биноан жавобгарликка тортилган.