Лола Каримова ёрдами билан 3 нафар бола Францияда операция қилинди

Ўзбекистон Республикасининг Биринчи Президенти Ислом Каримовнинг кенжа қизи, “Сен ёлғиз эмассан” фонди ҳамда Ислом Каримов номидаги Республика хайрия жамоат фонди васийлик кенгаши раиси Лола Каримова-Тилляеванинг молиявий кўмаги билан жорий йилнинг январь ойида ўзбекистонлик уч нафар бола Францияда оғир жарроҳлик операцияларини ўтказди. Бу ҳақда “Сен ёлғиз эмассан” фондининг ижтимоий тармоқлардаги саҳифасида хабар берилди. 

Наманганлик 4 яшар Севинч Умаралиева ва 10 яшар Комилахон Султанхонова, хоразмлик 10 яшар Алибек Абдуллаевда туғма юрак хасталиги мавжуд эди. 

Улар Франциянинг Нант шаҳридаги клиникада етакчи француз кардиожарроҳлари томонидан муваффақиятли операция қилинди. Алибек учун мазкур жарроҳлик операцияси иккинчи босқичда амалга оширилди. Биринчи босқич 2017 йилнинг март ойида Фонд кўмаги билан Францияда ўтказилган эди.

Нант шаҳридаги клиникага болалар оналари билан биргаликда юборилди. Ташҳислар ўта оғир бўлганлиги сабабли ҳар бир операция 8-10 соат давом этган. 

“Бундай оғир пайтларда, албатта, яқин инсонларнинг далдаси ва меҳри жуда зарур. Шунинг учун болаларни чет элга операцияга она ёки бувилари билан биргаликда жўнатамиз. Француз шифокорлари болажонларнинг ота-оналарини фарзандларининг аҳволи ҳақида мунтазам ва тўлиқ хабардор қилиб туришлари учун фондимиз томонидан ҳар сафар улар билан бирга таржимон юборилади. Операциядан сўнг болалар яна бир – бир ярим ой давомида Франция шифохонасида даволанадилар”, дейилади Фонд тарқатган ахборотда. 

Тошкентдан Францияга самолётда сафар пайтида соғлиғи заиф болажонларнинг аҳволини назорат остида ушлаб туриш мақсадида Фонднинг малакали шифокори уларга ҳамроҳлик қилади. 

Маълумот ўрнида, Sen Yolg'iz Emassan - You are not alone foundation Фондининг молиявий кўмаги билан 2015 йилдан бери франциялик кардиожарроҳлар томонидан ўзбекистонлик кам таъминланган оила фарзандлари ва Меҳрибонлик уйи тарбияланувчиларига жами 100 яқин мураккаб юрак операциялари амалга оширилган. Улардан 16 таси Франциянинг Нант шаҳридаги клиникада бажарилди.