Коронавирус қурбонлари сони 1500 дан ошди. Вирус Африкага кирди

Хитойда пайдо бўлган COVIFD-19 вируси бўйича сўнгги маълумотлар билан танишамиз. Бугун, 15 февраль ҳолатига вирусдан касалланганлар сони 2641 нафарга ортиб, 67 100 нафарга етди. Аҳамиятлиси касалликка чалинганлар сони фақатгина Хитойда кўпайди.

Вирусдан даволанганлар сони 8206 нафарга етди. Беморларнинг 11 082 нафари ёки 19 фоизи оғир аҳволда. Коронавирус қурбонлари сони 1526 нафарга етди.

Шунингдек, вирус яна бир қитъага кириб борди. Кеча, Мисрда коронавирусга чалинган илк бемор аниқланди. У чет эллик.

Янги коронавирус

Хитойнинг Хубэй провинцияси маркази Ухань шаҳрида ўтган йилнинг декабрь ойи ўрталарида янги вирус пайдо бўлди. Хитой Ҳукумати 31 декабрь куни Жаҳон Соғлиқни сақлаш ташкилотини мамлакатда эпидемия бошлангани ҳақида огоҳлантирди.

Коронавирус билан касалланганлар ҳозирча Хитойдан ташқари 28 давлат – Япония, Таиланд, Сингапур, Жанубий Корея, Гонконг, Австралия, Тайвань, Макао, Малайзия, Америка Қўшма Штатлар, Германия, Вьетнам, Франция, Бирлашган Араб Амирликлари, Канада, Филиппин, Буюк Британия, Россия, Италия, Ҳиндистон, Финляндия, Швеция, Шри-Ланка, Камбожа, Непал, Испания, Бельгия ва Мисрда аниқланди.

ЖССТ янги коронавируснинг дунёга тарқалиши сабабли Жамоат соғлиғи учун халқаро хавотирга молик фавқулодда вазият жорий қилди. Бу инсоният соғлиғи учун жиддий хавф туғилганда эълон қилинадиган расмий мақом ҳисобланади.

Коронавирус бугунгача қурбонлар сони бўйича 2002 йилдаги атипик пневмония (SARS) ва 2012 йилдан бери Яқин Шарқ респиратор синдромини (MERS-CoV) ортда қолдирди. SARS`дан 8096 нафар одам касалланган, шулардан 774 нафари (ўлим даражаси 9,6 фоиз) ҳалок бўлган. MERS-CoV вирусидан 2494 нафар одам касалланиб, уларнинг 858 (ўлим даражаси 34,4 фоиз) нафари қурбон бўлган.