Коронавирус юқтирганлар 1 500 000 дан ошди

Бугун, 9 апрель куни дунёда коронавирус инфекциясига чалинганлар сони 1,5 млндан ошиб, 1 506 936 кетди. Вирус қурбонлари 90 057 нафарни ташкил этяпти, 340 630 киши касалликдан фориғ бўлган. 

Вирус тақралиши бўйича АҚШ мутлақ етакчилик қиляпти. Мамлакатда 432 596 киши коронавирус юқтирган. Уларнинг 14 831 нафари вафот этган ва 24790 нафари даволанган. АҚШда икки кундан бери қурбонлар сони антирекорд ўрнатяпти.

Коронавирус тарқалиши бўйича иккинчи ўринда Испания кетяпти. Мамлакатда 152 446 кишида коронавирус аниқланган. Шундан 52 165 киши даволанган, 15 238 киши ҳалок бўлган.

Европада коронавирус ўчоғи бўлган Италияда 139 422 кишида коронавирус аниқланган. Қурбонлар 17 669 нафарга етди. 28 470 киши касалликдан фориғ бўлди.

Германия COVID-19 инфекциясининг тарқалиш кўлами бўйича тўртинчи ўринда боряпти. Мамлакатда 114 257 кишида коронавирус аниқланган. Уларнинг 2349 нафари вафот этган ва 46 300 нафари даволанган.

Коронавирус тарқалиши бўйича дастлабки бешталикни Франция якунлаб берган. Бугунгача Фаранцияда 83 080 киши коронавирус юқтирган. Уларнинг 10 887 нафари вафот этган ва 21 461 нафари даволанган.

Коронавирус тарқалиши бўйича кейинги бешталикдан Хитой (82 883), Эрон (66 220), Буюк Британия (61 516), Туркия (38 226) ва Бельгия (24 983) жой олган.

Эслатиб ўтамиз, Ўзбекистонда коронавирусни юқтириб олиш билан боғлиқ илк ҳолат жорий йилнинг 15 март куни қайд этилган эди. Айни вақтгача коронавирусга чалинганлар сони 582 нафарга етди. Бугунгача уларнинг 38 нафари даволанди ва 3 нафари вафот этди.

Қадрли юртдошлар, карантин даврида зарурат бўлмаса, кўчага чиқманг. Вақтни оилангиз, фарзандларингиз даврасида ўтказинг. Унутманг, #UydaHayotBor