... Qalampir - Ҳақиқат аччиқ бўлади
МЕНЮ
ONLINE TV

Шавкат Мирзиёев Хоразмда яна учта раҳбарни ишдан бўшатди


23:47, 24.04.2018 Жамият
 8 353

Йиғилишда ҳеч нарса қарсак билан бўлмаслиги, ишдаги тартиб ва интизом юқори натижаларнинг қўлга киритилишида бирламчи омил бўлиши лозимлиги айтиб ўтилди.

Ўзбекистон Республикаси Президенти Шавкат Мирзиёев Хоразм вилоятида ҳукумат аъзолари, вазирлик ва идоралар раҳбарлари, вилоят ва туман ҳокимлари ва тегишли соҳалар мутасаддилари иштирокида йиғилиш ўтказди. Бу ҳақда Президент Матбуот хизмати хабар бермоқда.
 
Танқидий руҳда ўтган йиғилишда давлат Раҳбари вилоятда кейинги пайтда ижтимоий-иқтисодий ривожланишда кўплаб масалалар тўпланиб қолгани, муаммоларни ҳал этишда вилоят раҳбариятининг ишни бўшаштириб юборгани, вилоятнинг биринчи раҳбарида талабчанлик ва қатъият етишмаганини кўрсатиб ўтди. Шунингдек, вилоят, шаҳар ва туманлардаги секторларнинг ишлари ҳам қониқарсиз ташкил этилганини қайд этди.  
 
Йиғилишда ҳеч нарса қарсак билан бўлмаслиги, ишдаги тартиб ва интизом юқори натижаларнинг қўлга киритилишида бирламчи омил бўлиши лозимлиги айтиб ўтилди.
 
Вилоятда кўплаб соҳаларда оқсоқликлар кузатилмоқда. Янги иш жойларини ташкил этиш, бюджетнинг даромадлар базасини кенгайтириш, вилоят экспорт салоҳиятини ошириш, боқиманда қарздорликни камайтириш, шаҳар ва қишлоқларни ободонлаштириш ишларида жиддий қолоқликлар мавжудлиги, вилоятнинг туризм имкониятлари кенг бўлишига қарамасдан, ушбу соҳада ҳам кўплаб муаммолар тўпланиб қолганлиги таъкидланди.
 
Ишда йўл қўйган жиддий камчиликлари учун Халқ депутатлари Хоразм вилояти кенгашининг 21 апрель куни бўлиб ўтган навбатдан ташқари сессиясида вилоят ҳокими Илгизар Собиров вазифасидан озод қилинганди. Унинг ўрнига Фарҳод Эрманов вилоят ҳокими вазифасини вақтинча бажарувчи этиб тайинланган.
 
Йиғилишда йўл қўйган сусткашликлари учун вилоят ҳокимининг иқтисодий масалалар бўйича биринчи ўринбосари Мақсуд Сапаев, Инвестициялар бўйича ўринбосари Темур Раҳмонов ҳамда Қўшкўпир тумани ҳокими Сардор Юсупов эгаллаб турган вазифасидан озод этилди. Бундан ташқари, сектор раҳбарларига, бир қанча мутасаддиларга интизомий жазо чоралари кўрилди ва уларга синов муддати берилди.
 
Йиғилишда вилоятнинг янги раҳбарияти ва барча мутасаддилар олдига қатор вазифалар қўйилди.
 
“Барча ҳокимлар, идора ва ташкилотлар раҳбарлари уйғониши, ўзини қийнаши керак. Вилоятни ривожлантириш, одамларни рози қилиш ва уларнинг турмуш фаровонлигини ошириш ҳар бир раҳбарнинг асосий вазифаси бўлиши керак”, деди Шавкат Мирзиёев.
Акмалхон Эшонхонов

Теглар:Шавкат Мирзиёев Хоразм йиғилиш 

Дўстларингиз билан бўлишинг:



Ўхшаш мақолалар


Изоҳлар




Изоҳлар


Биринчи бўлиб ўз фикрингизни қолдиринг!

Тавсия

Сўровлар

qalampir.uz сайтини баҳоланг!

Барча сўровлар