Россия ядровий машғулотларга тайёрланмоқда

Россия Украинанинг иттифоқдошларини огоҳлантириб, ядро қуроли бўйича машғулотларни эълон қилди. Бу ҳақда, бугун, 6 май куни Россия Мудофаа вазирлиги маълум қилди. 

Вазирлик баёнотида айтилишича, машғулотлар Ғарбнинг айрим расмийларининг Россия Федерациясига нисбатан провокацион баёнотлари ва таҳдидларига жавобдир.

Қайд этиш жоизки, Россия стратегик ядровий кучлари мунтазам равишда машғулотлар ўтказиб турса-да, бу тактик ядровий қуроллар бўйича машғулотларнинг биринчи марта очиқ эълон қилинишидир. Бу эълон Украинанинг Ғарбдаги иттифоқчиларига икки йилдан ортиқ давом этган урушга янада чуқурроқ аралашиш ҳақида огоҳлантириш бўлди. Украинанинг баъзи шериклари аввалроқ уруш Украинадан ташқарига чиқиб кетиши, НАТО ва Россия ўртасидаги можарога олиб келиши мумкинлигидан хавотирда эканини билдирганди.

Хусусан, Франция Президенти Эммануэль Макрон ўтган ҳафта Украинага қўшин юборишни истисно қилмаслигини такрорлади, Буюк Британия Ташқи ишлар вазири Дэвид Кэмерон эса Киев кучлари Россия ичидаги нишонларга зарба бериш учун Британиянинг узоқ масофали қуролларидан фойдаланиши мумкинлигини айтди.

Кремль бу изоҳларни хавфли, Россия ва НАТО ўртасидаги кескинликни кучайтирувчи, дея баҳолади. Уруш аллақачон Москва ва Ғарб ўртасидаги муносабатларга жиддий таранглик келтирган.

Тактик ядро қуролларига ҳаво бомбалари, қисқа масофали ракеталар учун каллаклар ва артиллерия ўқ-дорилари киради ва у жанг майдонида фойдаланиш учун мўлжалланган.

Тактик ядровий қуроллар бутун шаҳарларни йўқ қилишга мўлжалланган қитъалараро баллистик ракеталарни қуроллантирадиган улкан каллакларга қараганда камроқ рентабелликка эга.

Вазирликнинг таъкидлашича, машғулотлар “стратегик бўлмаган ядровий кучларнинг жанговар вазифаларни бажаришга тайёрлигини ошириш” учун мўлжалланган ва Президент Владимир Путиннинг буйруғи билан ўтказилади. Маълумотларга кўра, манёврларда Жанубий ҳарбий округнинг ракета бўлинмалари ҳамда ҳаво кучлари ва денгиз флоти иштирок этади.

Муқаддасхон Саттарова