Марказий Осиё мамлакатларининг қай бирида коронавирус бўйича вазият жиддий?

Дунё бўйлаб коронавирусга чалинганлар 24,5 миллионга яқинлашди. Ўзбекистон коронавирус тарқалган мамлакатлар қаторида 59-ўринда бормоқда. Сўнгги маълумотларга кўра, мамлакатда коронавирусга чалинганлар 40 613 нафарни ташкил этмоқда. Улардан 37 200 нафари ёки умумий беморларнинг 92 фоизи соғайган. Шифохоналарда 3 113 беморнинг даволаниши давом этмоқда. Улардан 279 нафари оғир, 133 нафари эса ўта оғир аҳволда. Ушбу вирусдан вафот этганлар бўйича расмий кўрсаткич эса 300 нафарни ташкил этмоқда. 

Марказий Осиё мамлакатлари орасида коронавирус тарқалиши жиддий тус олаётган мамлакат Қозоғистон бўлиб қолмоқда. У дунё миқёсидаги статистиканинг 30-ўрнини эгаллаган. Мамлакатда 105 408 киши коронавирусга чалинган. Уларнинг 95 253 нафари ёки 90 фоизи соғайган. 1 523 киши эса вафот этган. Қозоғистон дунё бўйича кучайтирилган карантин чораларига қайтган биринчи мамлакат бўлганига қарамай, мамлакатда коронавирус билан боғлиқ вазият кун сайин хавфли тус олиб бормоқда. 

Жаҳон статистикасининг 54-ўрнини Қирғизистон Республикаси эгалламоқда. Мамлакатда ушбу касалликка чалингларнинг умумий кўрсаткичи 43 587 нафарни ташкил этмоқда. Беморларнинг 37 726 нафари ёки 86 фоизи соғайган. Вафот этганлар 1 057 киши. 

Афғонистон эса дунё рейтингида Ўзбекистондан кейинги поғонани эгаллаб, 60-ўринда бормоқда. Ушбу мамлакатда коронавирусга чалинган беморлар 38 140 нафарни ташкил этмоқда. Уларнинг 29 059 нафари ёки жами беморларнинг 76 фоизи соғайган. Вафот этганлар эса 1 402 нафарга етган. 

Марказий Осиё давлатлари орасида коронавирус билан боғлиқ энг яхши натижа Тожикистонда қайд этилмоқда. Мамлакат дунё рейтингида 96-ўринда бормоқда. Унда вирусдан 8 449 киши зарарланган. Беморларнинг 7 246 нафари ёки 85,7 фоизи соғайган. Ўлим кўрсаткичи ҳам жуда паст. Беморларнинг 68 нафари вафот этган. 

Туркманистонда эса вазият ҳамон барқарор. Расмий Ашхобод мамлакатда коронаврус аниқлангани билан боғлиқ ҳолатларни рад этиб келаётган бўлса-да, аллақачон карантиннинг асосий чоралари бўлган ижтимоий масофа ва тиббий ниқоб тақиш мажбурий этиб белгиланган. Бундан ташқари Ҳукумат ўқув йилини дарс соатларини қисқартириш билан бошлашини эълон қилди.