Грецияда муҳожирларга қарши чиқишди. Ишга полиция аралашди

25 февраль куни Грецияда муҳожирлар учун лагер бунёд қилишга мўлжалланган қурилиш техникаларини келтириш одамларнинг норозилигига сабаб бўлди ва улар намойишга чиқди. Мамлакат полицияси Лесбос ва Хиос ороли аҳолисига қарши кўздан ёш оқизувчи газлардан фойдаланишга мажбур бўлди. Бу ҳақида АМНА янгиликлар агентлиги хабар бермоқда.

“Бугун эрталаб Митилини (Лесвос) ва Местон (Хиос) портларига муҳожирлар учун ёпиқ ва қўриқланадиган марказ қуриш мақсадида қурилиш техникалари келтирилди. Полиция муаммосиз ишлашлари учун ходим ва техникаларга ҳамроҳлик қилди”, дейилади хабарда.

Айни пайтда Грецияда 150 минг нафар муҳожир ва қочқин бор. Уларнинг аксариятини афғонистонликлар ташкил этади.

АМНА агентлигининг хабар беришича, олиб келинган қурилиш техникалари тартибсизликларга сабаб бўлган.

“Митилини порти тунда деярли икки соат давомида жанг майдонига айланди. Полиция махсус кучларининг ўнта бўлими "Пегас" кемасида оролга етиб келди. Оролда юзлаб маҳаллий аҳоли вакиллари йиғилган эди. Полиция кўздан ёш оқизувчи газ ва енгил шовқинли гранаталарни ишлатди”, деб хабар берган агентлик.

Олиб келинган техникалар қурилиш режалаштирилган Кавакли ва Карава пунктлари томон йўл олган.

Хиос оролидаги Места портида ҳам тўқнашувлар содир бўлган. Кўздан ёш оқизувчи газдан орол мэри Стаматис Кармантзис ва бир нафар руҳоний жабрланган. Улар шифохонага ётқизилган.