ДСҚ Instagram'да “Giveaway” ўтказаётганлар солиққа тортилишини айтяпти

Жамият

image

Бугунги кунда Instagram ижтимоий тармоғида минглаб кузатувчиларга эга бўлган блогерлар ва шоу-бизнес вакилларининг “Giveaway” ютуқли ўйинларини ўтказишлари оммалашиб бормоқда. Ўзбекистон Республикаси Давлат солиқ қўмитаси ижтимоий тармоқлардаги саҳифасида “Giveaway” ўтказганлар 12 фоиз солиқ тўлаши кераклигини эслатиб чиқди.

Солиқ қўмитасининг алоҳида урғулашича, Солиқ кодексининг 393-моддасида “Амалдаги қонунчиликка асосан, солиқ солинадиган даромадларга жисмоний шахсларнинг мулкий даромадлари, илм-фан, адабиёт ва санъат асарларини яратганлик ҳамда улардан фойдаланганлик учун муаллифлик ҳақи тариқасида олинган даромадлари, моддий наф тарзидаги даромадлари, Ўзбекистон Республикаси ҳудудидан ташқаридаги манбалардан олинган даромадлари ва солиқ агентлари бўлмаган манбалардан олинган бошқа даромадлари киради”, деб ёзилган. 

“Агар жисмоний шахслар олган даромадлари солиқ агентлари бўлмаган манбалардан олинган бошқа даромадлари бўлса, ушбу даромадлари жами йиллик даромад тўғрисидаги декларация асосида солиққа тортилади (қонунчиликдаги имтиёзлари инобатга олинган ҳолда). Бу ҳақда доимий яшаш жойидаги солиқ органига ҳисобот йилидан кейинги йилнинг 1 апрелидан кечиктирмай жами йиллик даромад тўғрисидаги декларацияни тақдим этиш лозим.

Юқоридагилардан келиб чиқиб, ижтимоий тармоқларда реклама қилиш фаолияти (Giveaway) билан шуғуллувчи жисмоний шахслар олган даромадларидан 12 фоиз миқдоридаги ставкада даромад солиғи тўлашлари лозим (2020 йил 1 июлига қадар олган даромадлари бўйича)”, дейилади ДСҚ ахборотида.

Таъкидланишича, Ўзбекистон Республикаси Президентининг 2020 йил 8 июндаги ПҚ-4742-сонли қарорига асосан, ўзини ўзи банд қиладиган шахслар шуғулланиши мумкин бўлган фаолият турлари рўйхати кенгайтирилган. Ушбу фаолият турлари рўйхатига АКТ соҳасида хизмат кўрсатиш – “Ижтимоий тармоқлардаги фаолият” (ижтимоий тармоқларда хизматларни илгари суриш ва реклама қилиш (SMM), ижтимоий тармоқ саҳифалари администратори) тури киритилган.

Шунга кўра, Ўзбекистон Республикаси Солиқ кодексининг 369-моддасига мувофиқ қонун ҳужжатларида белгиланадиган тартибда ўзини ўзи банд қилган шахсларнинг меҳнат фаолияти натижасида олинган даромадлари жами даромадлари таркибига киритилмаслиги учун даромад солиғидан озод қилинади.

Жорий йилнинг 1 июлидан бошлаб ижтимоий тармоқлардаги фаолият, яъни ижтимоий тармоқларда хизматларни илгари суриш ва реклама қилиш ҳамда ижтимоий тармоқ саҳифалари администратори ўзини ўзи банд этган шахс сифатида рўйхатдан ўтган бўлса олган даромадлари бўйича жисмоний шахслардан олинадиган даромад солиғидан озод қилинади.

Бунда меҳнат стажига эга бўлиш учун 2020 йилда базавий ҳисоблаш миқдорининг камида 50 фоизи (111,5 минг сўм) миқдорида ижтимоий солиқ тўлаш лозим бўлади.


Мақола муаллифи

Теглар

Давлат солиқ қўмитаси Giveaway

Баҳолаганлар

112

Рейтинг

3

Мақолага баҳо беринг

Дўстларингиз билан улашинг