Коронавирусга чалинган, юрак хасталиги бор аёл фарзандли бўлди

Бугун, 1 май куни 24 ёшли коронавирусга чалинган аёл фарзандли бўлди. Бу ҳақда Соғлиқни сақлаш вазирлиги хабар берди.

Таъкидланишича, аёлда туғма юрак хасталиги бўлган. Лекин, шунга қарамай, аёл фарзанд дунёга келтирган.

У.Б. исмли аёл шу йилнинг 9 апрель куни Тошкент шаҳар 4-сон клиник шифохонасининг туғруқ бўлимига “Ҳомиладорлик 1. 32-33 ҳафта. Ўткир респиратор касаллиги” ташхиси билан келган. Тиббиёт муассасасида коронавирус инфекциясига текшириш учун суртма олинган. 10 апрель куни таҳлил натижаси “мусбат” эканлиги аниқланган. Шундан сўнг, ҳомиладор аёлга ихтисослашган тиббий ёрдам кўрсатиш мақсадида пойтахтимиздаги 3-сон туғруқ комплексига оғир аҳволда ўтказилган

Таъкидланишича, туғруқ мажмуасида мутахассислардан: кардиохирург, кардиолог, пульмонолог, инфекционист, терапевт, анестезиолог-реанематолог ва акушер-гинекологлар томонидан аёл тиббий кўрикдан ўтказилиб, зарурий текширувлардан сўнг керакли даволаш чора-тадбирлари белгилашган. Кардиохирург томонидан туғруқни жарроҳлик йўли билан амалга ошириш тавсия қилинган.

“Бугун эрталаб бемор аёл вазни 3 150 грамм, бўйи 52 сантиметр бўлган ўғил бола чақалоқни дунёга келтирди. Фидойи шифокорларимизнинг тажрибаси сабаб мураккаб жарроҳлик амалиёти асоратсиз ўтиб, муваффақиятли якунланди. Ҳозирда аёлнинг ва янги туғилган чақалоқнинг аҳволи яхши, улар шифокорларнинг қатъий назорати остида“ дейилади вазирлик хабарида.

Эслатиб ўтамиз, Ўзбекистонда коронавирусни юқтириб олиш билан боғлиқ илк ҳолат жорий йилнинг 15 март куни қайд этилган эди. Айни вақтда мамлакатда коронавирус юқтирганлар 2075 нафарга етди. Бугунгача беморларнинг 9 нафари вафот этган.

Қадрли юртдошлар, карантин даврида зарурат бўлмаса, кўчага чиқманг. Вақтни оилангиз, фарзандларингиз даврасида ўтказинг. Унутманг, #UydaHayotBor