Футболда пенальти ва офсайд қоидалари ўзгарди

Халқаро Футбол Ассоциациялари Кенгаши (ХФАК) тўпни қўл билан ўйнаши, қизил ва сариқ карточкаларни кўрсатиш, пенальтини ижро этиш, VAR тизими ва тўпни алмаштириш билан боғлиқ ўйин қоидаларини ўзгартирди. Булардан офсайд қоидалари жиддий ўзгаришга учради.

Футболда қўл билан ўйнаш тақиқланган, аммо кўпинча ўйинда тўп тасодифан ўйинчиларнинг қўлига тегиб кетади. Эндиликда тўп ўйинчи қўлининг елка қисмидан бироз пастроғига тегса ўйин қоидаси бузилмаган ҳисобланади.

Офсайд

Агар ҳимояланаётган жамоанинг ўйинчиси ўз қўли билан қасддан ўйнаса ва шундан кейин тўп ҳужумкор футболчига келиб тушса, ушбу ҳолат офсайд ҳисобланмайди. Ушбу вақтда тўп ҳужумчининг қўлига тегса, қонунбузарлик, деб ҳисобланади.

Таъкидланишича, эндиликда ҳужумчининг бутун танаси ҳимоячидан олдинда бўлса ва улар ўртасида аниқ бўшлиқ пайдо бўлса, офсайд деб ҳисобланади. Аввал футболчининг бир қисми ҳимоячидан ўтиб кетса ҳам офсайд ҳисобланган. Бу эса турли можароларга сабаб бўлган.

VAR ва тўп алмашинуви

Шунингдек, янги қоидаларга кўра, VAR ҳакамлари фақат бош ҳакамга қарор тўғрисида маслаҳат беришлари мумкин. Аммо якуний қарор ҳар доим майдондаги ҳакам томонидан берилади. Тўпни алмаштиришга келсак, бу ҳолда янги тўпни ўйин тўхтатилган жойда “баҳсли тўп“ сифатида киритиш керак.

Сариқ карточкалар

Дарвозабон энди стандарт ўрнатганидан кейин тўпга тегса, огоҳлантириш олиши мумкин. Масалан, дарвозадан зарба ҳамда жарима зарбасида. Бундан ташқари, агар футболчи “баҳсли тўп“ киритилишида масофани сақламаса, сариқ карточка олади.

Пенальтилар

Агар дарвозабон зарба беришдан олдин дарвоза чизиғини тарк этса ва тўп тўсинга тегса ёки дарвоза олдидан ўтиб кетса, пенальтидан аниқ зарба беролмаган ўйинчи зарбани такрорламайди. Агар дарвозабон пенальтилар сериясида қоидани бузган бўлса, оғзаки огоҳлантирилади. Агар такроран бузилган бўлса, унга сариқ карточка кўрсатилади.